Stuoradiggedieđáhus válddaha máŋga hástalusa mánáidgárddis, vuođđooahpahusas ja alit oahpus:

• Sámi oahpaheaddjit váilot, ja lea unnán rekrutteren sihke mánáidgárdeoahpaheaddjeohppui ja oahpaheaddjeohppui, seammás go oahpaheaddjit mannet eará bargguide, ja dat váikkuha vejolašvuhtii fállat sámi mánáide buori pedagogalaš fálaldaga ja buori oahpahusa.
• Máŋga oahppi válljejit eret sámegiela joatkkaoahpahusas. Dat dahká ahte unnibut sáhttet ohcat ja ohcet alit oahpahussii sámegielas dahje sámegillii.
• Lea váttis rekrutteret fágalaš virggiide sámegielas universitehta- ja allaskuvlasuorggis.

Sámediggeráđđi Mikkel Eskil Mikkelsen (NSR) lohká stuoradiggedieđáhusa addit buori čilgejumi dain stuorámus hástalusain mat sámi servodagas leat, ja dat lea vuođđun Sámedikki bargui boahttevaš jagiid.

– Vuoruhansuorggit maid ráđđehus čujuha sáhttet veahkehit dahkat eanet olbmuid sámegielagin, muhto daid ferte čuovvolit konkrehta doaibmabijuiguin, dadjá Mikkelsen.

Sámediggeráđđi árvala dan dihte olu doaibmabijuid, maid Sámediggi galgá meannudit dievasčoahkkimis. Čađahit doaibmabijuid vai oahppit ohppet sámegiela vuođđooahpahusas ja leat sámegielagat go gerget vuođđooahpahusas, lea dat stuorámus ja deháleamos bargu boahtteáiggi rekrutterema ja gelbbolašvuođa sihkkarastimis.

Mikkelsen lohká leat guovddáš mihttun Sámediggái lea nannet oahpahusásahusaid vai dat sáhttet hukset nana ja stabiila oahpahusfálaldaga go lea sámi oahpaheaddjekriisa.

– Lea maid leamaš dehálaš geahčadit váikkuhangaskaomiid geavaheami go galgá rekrutteret eanet studeanttaid sámi oahppofálaldagaide.

Sámediggi lea gulahallan ráđđehusain dieđáhusa barggu áigge, ja áigu aktiivvalaččat ovddasduvdin leat barggus čoavdit dáid hástalusaid.

– Mus leat vuordámušat ráđđehusa čuovvoleapmái dieđáhusas, dadjá Mikkelsen.

Loga sámediggeráđi áššeovddidusa

Loga Dieđ. St. 13 (2022-2023) Sámi giella, kultuvra ja servodateallin – Gelbbolašvuohta ja rekrutteren mánáidgárddis, vuođđooahpahusas ja alit oahpus