Sámediggi lea loahpahan konsultašuvdnaproseassa Guolástusdirektoráhtain gonagasreabbábivddu regulerema birra jagis 2024, ja lea duhtavaš go leat šaddan ovtta oaivilii máŋgga čuoggás. Lassin dasa ahte bisuhit 200 000 ruvdnosaš gávpejohtugáibádusa vai olaha olles kvohta, de leat bealit soahpan lagabuidda geahčadit sturrodatheivehuvvon kvohtajuohkinmálle ja ahte lea dárbu vuđolaččat guorahallat olles gonagasreabbáhálddašeami málle.
Sámediggepresideantta mielas lea erenoamáš stuora dárbu dan dahkat dál go nálledilli lea nu go lea.
– Mu mielas fertešii ollislaččat geahčadit gonagasreabbáhálddašeami málle, ja dan lea lunddolaš dahkat stuoradiggedieđáhusas. Mis lea leamaš buorre gulahallan báikkálaš guolásteddjiid organisašuvnnaiguin ovdal konsultašuvnnaid, ja sii leat buohkat leamaš čielgasat das ahte ođđa guolástusministtar berrešii fuolahit ahte dakkár bargu lea gárvvis ovdalgo jagi 2025 reguleremat mearriduvvojit.
Sámediggi lea maiddái soahpan Guolástusdirektoráhtain ahte mearraluossabivddu ja maiddái ruoššaluossabivddu gávpejohtu galggašii leat vuođđun gonagasreabbákvohta juohkimii jagis 2024. Dasa lassin lei ovttaoaivilvuohta das ahte sidjiide geaidda luossabivdogielddus lea čuohcan, galggaše beassat váldit vuođu ovtta dan maŋemus golmma jagi gávpejođus mii lei ovdal go luossabivdu gildojuvvui.
– Dat ii soaitte guoskat nu máŋgasii, muhto dat lea dehálaš daidda geaidda guoská ja lea vuohki viidásetfievrridit hirbmat dehálaš oasi mearrasámi kultuvrras, dadjá sámediggepresideanta.
Sámediggi áigu čuovvulit gonagasreabbáhálddašanmearrádusa jahkái 2024 konsultašuvnnaid bokte Ealáhus- ja guolástusdepartemeanttain, ja vuordá ahte ovttaoaivilvuohta Guolástusdirektoráhtain šaddá mearrideaddjin.