Presideanta Silje Karine Muotka ja dievasčoahkkinjođiheaddji Sandra Márjá West šloahta olggobealde. Inger Elin Kristina Utsi, Sámediggi

Sámediggepresideanta Silje Karine Muotka ja dievasčoahkkinjođiheaddji Sandra Márjá West ovddasteaba Sámedikki almmolaš oktavuođain ja seremoniijain morašáigodagas.

Sotnabeaivvi soai oassálasttiiga moraštanipmilbálvalusas Oslove duopmogirkus. Disdaga searvaba váli vuordnumii Stuoradikkis, ja bearjadaga searvaba earrodearvvuohtaaudiensii Šloahtas.

Sámediggi doahttala riikkaviidosaš moraštanáigodaga ja láidestusaid mat leat biddjojuvvon stáhta doaimmaide. Danne leat eanaš olggobeal doaimmat šluhttejuvvon dahje maŋiduvvon dassážii go hávdádeapmi lea leamaš. Plánejuvvon áirrasmátkkit dán áigodagas leat maiddái maŋiduvvon.

– Mii váldit oasi morrašis ja árvvusatnit moraštanáiggi. Dat mearkkaša ahte buot parlamentáralaš doaimmat šluhttejuvvojit dahje maŋiduvvojit dassážii go hávdádeapmi lea leamaš, dadjá sámediggepresideanta Silje Karine Muotka.

Danne ii čađahuvvoge plánejuvvon parlamentarihkkárkonferánsa, masa golmma riikka sámediggeáirasat galge čoahkkanit Girkonjárggas dán vahkus. Mihttomearri lea gávdnat ođđa dáhtoniid parlementarihkkárkonferánsii maŋŋil.

– Sámediggi váldá oasi morrašis. Gonagas Harald lea doalahan ja ovddidan buori oktavuođa Sámi álbmogin, ja son guođđá midjiide muittuid maid eat goassige vajálduhte, dadjá dievasčoahkkinjođiheaddji Sandra Márjá West.