– Mii leat hirbmat rápmásat go Library of Congress lea addán midjiide dán bálkkašumi, dadjá sámediggeráđđi Maja Kristine Jåma (NSR).
Dát bálkkašupmi lea rámádussan dan bargui maid Sámedikki girjerádju lea dahkan ovddidit prošeavtta Lohkh munnjien/Loga munnje/Les for meg ovttasbarggus Foreningen Les, Sámi lohkanguovddážiin ja gielddaiguin miehtá riikka.
Lohkh munnjien/Loga munnje/Les for meg lea lohkankampánja man ulbmil lea ovddidit mánáid ja nuoraid lohkama sámegiela giellaguovllus. Lohkankampánja ulbmil lea nannet sámi mánáid gielalaš ja kultuvrralaš identitehta jitnosit lohkama bokte ja sámi girjjálašvuođa fidnema bokte.
Áŋggirdeapmi fuolaha ahte buot sámi smávvamánnábearrašat ožžot girjjiid nuvttá sin gieldda dearvvašvuođastašuvnnas ja girjerádjosis. Dearvvašvuođastašuvnnat ja álbmotgirjerádjosat besset Sámedikki girjerádjosis nuvttá diŋgot girjeskeaŋkkaid maid besset addit viidáseappot. Sii sáhttet maid ovttasbargat lágidemiid oktavuođas, nugo mánáidlávluma ja jitnosit lohkama oktavuođas. Dál leat 35 gieldda mielde prošeavttas. Ollugat leat jearahan girjjiid ja materiálaid mat leat diŋgojuvvon dearvvašvuođastašuvnnaide ja girjerádjosiidda.
Library of Congress Literacy Awards Program gudnijahttá organisašuvnnaid mat dahket deaŧalaš barggu eastadit analfabetismma ja ovddidit lohkanmovtta. Library of Congress dat ásahii prográmma Library of Congress Literacy Awards Program jagis 2013:s ja dat galgá rámidit ja doarjut organisašuvnnaid mat vuohkkasit ovddidit lohkanmáhtu ja oahpu. Prográmma ulbmil lea movttiidahttit ođđa lahkonanvugiide eastadit analfabetismma ja doarjut oahpahusa miehtá máilmmi.
– Mii illudit hukset dán bálkkašumi ala ja lágidit doaluid, ovttasbargguin girjerádjosiiguin, dearvvašvuođaguovddážiiguin ja mánáidgárddiiguin. Sámediggi lea maid ráhkadeamen ođđa vugiid movttiidahttit sámi stuorrabearraša jitnosit lohkat mánáide - Áhkku ja áddjá lohkki munnje! Go movttiidahttá buohkaid searvat jitnosit lohkamii, de deattuhuvvojit kultuvrralaš erenoamášvuođat mat gullet sámi servodahkii, juoga mii lea hui deaŧalaš sihke gielalaš ja kultuvrralaš ovdáneapmái, dadjá Jåma loahpas.
Bálkkašupmi geigejuvvo Washington DC:s golggotmánu 30. beaivvi dán jagi, ja Sámediggi, girjerádjosa bargiid bokte, searvá bálkkašumi vuostáiváldimii.
Loga eanet: https://newsroom.loc.gov/news/library-of-congress-announces-2024-literacy-awards-including-two-inaugural-prizes/s/ba65a921-1ec9-4ad2-8f6b-17c1cea43b7c