– Dá lea hui váidalahtti mearrádus. Dán leat mearridan nu ahte váikkuhusguorahallamii eai leat váldán mielde plánejuvvon bieggafápmohuksemiid orohagain maidda dát guoská, dadjá sámediggeráđđi Ole Henrik Bjørkmo Lifjell (NSR).
Sámediggi lea ovddidan vuostecealkámuša doibmii ja oaivvilda linjjá dárbbašmeahttumin. Dan sadjái Sámediggi lea árvalan hukset 132kV-linjjá molssaeaktun mas leat unnit váikkuhusat.
Ollislaš váikkuhusaid váilevaš guorahallan
Konsultašuvnnain Energiijadepartemeanttain ii šaddan ovttaoaivilvuohta dehálaš čuoggáid hárrái. Departemeanta čuoččuha ahte bieggafápmoplánat eai leat nu čielgasat ahte daid sáhttá váldit vuhtii go árvvoštallá ollislaš váikkuhusaid boazodollui. Sámediggi ges oaivvilda ollu plánaid bieggafámuid birra konkrehtan, ja vuođđun dasa ahte lea dárbu 420kV-linjái.
– Energiijaministtar ieš duođašta ahte linjá láhčá vejolašvuođa buvttadit eambbo elfámu ja ahte dat lea olahus Finnmárkku elfápmoloktemis. De ferte maid ollislaččat árvvoštallat movt dát čuohcá boazodollui, SP 27. artihkkala vuođul, dadjá Bjørkmo Lifjell.
Dárbbašmeahttun ja divrras doaibma
Sámediggi oaivvilda ahte elfámu buvttadeami Nuorta-Finnmárkkus lei sáhttit sihkkarastit ođđa 132kV-linjjá huksemiin Leavnnja ja Áttánjoga gaskii, lassin linjjáide mat jo gávdnojit. Ođđa 420kV-linjjá huksen orru leamen dárbbašmeahttun divrras ja dagaha stuora váikkuhusaid.
– Statnetta iežas analysat čájehit ahte ođđa 132kV-linjá mearkkašahtti ládje buoridivččii elfámu buvttadeami sihkkarastima Nuorta-Finnmárkkus. 420kV-linjjá válljen orru leamen badjelmearálaš čoavddus, sihke goluid dáfus ja sisabahkkema dáfus sámi geavahanguovlluide, dadjá Bjørkmo Lifjell.
Cuiggodit váikkuhusguorahallama
NVE bivddii njukčamánus 2024 olggobeale aktevrra geahčadit váikkuhusguorahallama. NIBIO oaččui dan barggu, muhto das lei unnán áigi. Sin lassiraporttas mii geigejuvvui suoidnemánu 1. beaivvi 2024, cuiggoduvvo ollislaš váikkuhusaid váilevaš árvvoštallan. Liikká adnojuvvui guorahallan vuođđun mearrádussii gonagaslaš resolušuvnna bokte.
– Energiijadepartemeanta čájeha gáržžes ipmárdusa das mii ollislaš váikkuhusaid guorahallamis galgá leat mielde. Dat ii veahket sihkkarastit sápmelaččaid bohtteáiggi, loahpaha Bjørkmo Lifjell.