Otná čoahkkimis jerrojuvvojedje máŋga gažaldaga reivviid sisdoalu birra mat sáddejuvvojedje álggogeahčen cuoŋománu 2023 sidjiide geat gáibidedje čálihuvvot jienastuslohkui. Dađibahábut celko dajaldat dárogielat veršuvnnas reivves biehttaleapmin, iige ávžžuhussan ahte ohcci sádde sisa eanet dieđuid nugo áigumuš Sámediggái lei.

- Go fuomášeimmet ahte Sámedikkis lei boasttu sátnádeapmi reivves, de sáddejuvvojedje ođđa reivvet rivttes sátnádeamiin, lohká dievasčoahkkinjođiheaddji Tom Sottinen (Bb).

Sottinen šálloša go reivve sisdoallu mii sáddejuvvui áigodagas cuoŋománu cuoŋománu 1. b. - 20. b. 2023 lei čállon biehttaleapmin. Sámediggi ii lean kvalitehta dáfus sihkkarastán ahte dárogiel jorgalus soahpá sámegiel jorgalusaide, ja dat lea hui šállošahtti.