Bálkkašupmi addo erenoamáš buori ánsobarggus, go Elle Hánsa lea eallinagi bargan dáiddárin ja maid gozihan álgoálbmotvuoigatvuođaid.Silje Karine Muotka

– Sámediggi sávvá hui olu lihku Elle Hánsii. Son lea vuđolaččat ja čehpet bargan dáiddasuorggis ja lea áiggiid čađa dáidagiiddis bokte čájehan man dehálaš lea sápmelaččaid eallin, kultuvra, birgejupmi ja vuoigatvuođat, dadjá sámediggepresideanta Silje Karine Muotka.

Sámediggepresideantta mielas Elle Hánsa duođai ánssáša dán gudneárvomearkka ja nammaduvvot 1. luohká Riddárin, go son gierdevaččat ja áŋgirvuođain lea máŋggaid logiid jagiid čalmmustahttán sámi dáidaga viidát, sihke Sámis, davviriikkain ja muđui máilmmis.  Elle Hánsa lei maid okta sis gii fárrii Mázii 1970-logus ja lei mielde ásaheamen Máze dáiddajoavkku.

– Elle Hánsa lea leamaš dárkilis jurddašeaddji dáiddár. Son govaidis bokte muitala mat áššit leat dehálaččat sápmelaččaide. Háliidan giitit go nu áŋgirit ja vuđolaččat lea bargan sámi báikenamaiguin. Son álggii jagis 1974:s sárgut daid vuosttaš dáiddakárttaid masa bijai sámi báikenamaid. Son lea čohkken duháhiid miel báikenamaid ja lea geargan ráhkadit 21 dáiddakártta, dadjá Muotka.

Elle Hánsii, Hans Ragnar Mathisenii, geigejuvvo St. Olav árvomearka Romssas gaskavahku borgemánu 31. beaivvi.

Jearahallama addá sámediggepresideanta Silje Karine Muotka (NSR), +47 984 87 576, silje.karine.muotka@samediggi.no