Sámedikki presideanta sávvá lihku María Corina Machadoi jagi 2025 Nobela ráfibálkkašumiin ja rámida su guhkesáigásaš rahčamuša demokratiija ja olmmošvuoigatvuođaid ovddas Venezuelas.

Dán oktavuođas háliida Sámediggi bidjat fuomášumi Venezuela álgoálbmogiid duođalaš dillái.

Venezuela álgoálbmogat leat máŋggaid jagiid eallán áitagiiguin sin eallimii, guovlluide ja vuoigatvuođaide. Ollu álgoálbmotguovllut leat šaddan gillát militariserema, ruvkeávkkástallan ja birasbillistemiid dihte - dávjá almmá báikegottiid miehtama haga. Álgoálbmotorganisašuvnnat leat raporteren eretvuojeheami, veahkaválddálašvuođa ja vuođđobálvalusaid váiluma birra.

– Nobel-ráfibálkkašupmi María Corina Machadoi addá deaŧalaš vejolašvuođa loktet álgoálbmogiid jienaid ja sihkkarastit ahte sin vuoigatvuođat šaddet integrerejuvvon oassin buot demokratiija nuppástusain Venezuela, dadjá Sámedikki presideanta Silje Karine Muotka (NSR).

Sámediggi čuožžu ovttas álgoálbmotorganisašuvnnaiguin Venezuelas ja doarju sin rahčamuša iešmearrideami, kultuvrralaš birgejumi ja sin árbevirolaš guovlluid suodjaleami ovddas.

– Mii ávžžuhit riikkaidgaskasaš servodaga sihkkarastit dan ahte álgoálbmotvuoigatvuođat árvvusadnojuvvojit ja nannejuvvojit boahtteáiggi Venezuelas, dadjá Muotka.

Sámediggi áigu čuovvut ovdáneami dárkilit ja árvvoštallat movt mii sáhttit leat mielde nanneme álgoálbmotvuoigatvuođaid riikkaidgaskasaččat, fárrolaga álgoálbmotorganisašuvnnaiguin ja relevánta aktevrraiguin.