Erke searvá fágaseminárii duorastaga mas fáddá lea «davviriikkalaš perspektiivvat báikkálaš biepmuide: biebmu, kultuvra ja ovttasbargu», man Eanadoallo- ja biebmodepartemeanta lágida. Bearjadaga almmolaččat rahppojuvvojit Norgga čájáhusbeavddit meassuin. 

Norgga ovddastit dán jagi Vestlándda ja Davvi-Norgga delegašuvnnat. Norgga searvan veahkeha nannet Norgga biepmuid ja mátkeealáhusaid beaggima. Nordlándda, Romssa ja Finnmárkku biebmo- ja mátkeealáhusfitnodagaid gaskkas leat máŋga sámi aktevrra. Sámediggi lea ollu deattuhan sámi biepmuid máŋgga prošeavttas, ja lea erenoamáš somá go sámi biepmut maiddái oainnusmahttojuvvojit Berlinas. 

– Sámi borramuš lea lunddolaš, máŋggabealat ja hui bibmui. Dan vuolggasadjin leat báikkálaš vuođđoávdnasat ja resurssat, ja maiddái árbevierut, ja seammás dasa maiddái gullet ođđa hutkosat ja ovdánahttin. Dás oaidnit stuora vejolašvuođaid sámi biebmoealáhusaid ovdánahttimis ja mii sávvat ahte boahtteáiggis leat ollu eambbo biebmobuvttadeaddjit. Dan oktavuođas maiddái lea deaŧalaš searvat riikkaidgaskasaš arenaide, sihke oainnusmahttima ja gaskkusteami dihte, muhto maiddái oahppama dihte, ja vai oažžu inspirašuvnna earáin seammá suorggis, dadjá sámediggeráđđi Elisabeth Erke (Gb). 

– Biebmu ja biebmovuogádagat leat leamaš ja leat ain politihkalaš áŋgiruššansuorggit maid mii vuoruhit dán áigodagas, ja mii illudit lassáneaddji beroštumi ja báikkálaš, guvllolaš ja riikkaidgaskasaš ovdáneami dihte. Šaddá somá searvat biebmomeassuide ja oaidnit eambbo das mii meassuin dáhpáhuvvá, dadjá sámediggeráđđi Erke. 

Sámedikki prošeavttaid dáfus lea veara namuhit ovdadutkama sámi biepmuid birra – doaibmabijut fitnodagaide, mas iešguđet fitnodagat leat válljejuvvon guorahallat movt sáhttá ávkkástallagoahtit sámi biebmoárbevieruiguin ja oainnusmahttit daid. Prošeavttas bođii ovdan sávaldat oažžut sierra sámi biebmomearkka ja dat bargu joatkašuvvá jagis 2025. 

Sámi biepmuiguin áŋgiruššama olis lágida Sámediggi sámi biebmokonferánssa Álttás miessemánu 14. beaivvi. Biebmokonferánsii čoahkkanit miehtá Árktisa álgoálbmogat, ja doppe juogadit máhtu, vásáhusaid ja vejolaš čovdosiid álgoálbmogiid árktalaš vuođđoávdnasiid háhkama, buvttadeami ja ráhkadeami vugiid ceavzilis ovdáneapmái. Leat maiddái lágideamit ovdal ja maŋŋel konferánssa, miessemánu 13. ja 15. beivviid. Maistu.no-siiddus leat eambbo dieđut konferánssa birra. 

Sámi fitnodagat IGW:s:

Finnmárku:

Kautokeino Rein

Sokki Adventures

Romsa:

Davvi álbmogiid guovddáš

Destinasjon Sápmi

Nordlánda:

Inga Sami Siida

Sami Safari Camp

Aernie