– Statkrafta stuorra áŋgiruššan bieggafámuin nannámis dáhpáhuvvá danne go eiseválddit leat rahpan uvssa caggut Kraftløftet olis ja Muolkkuid elektrifiserenmearrádussain. Sámediggi vuordá ahte buohkat geat álggahit bieggafápmohuksemiid sámi guovlluin doahttalit daid lágaid ja njuolggadusaid mat mis leat. Mun vuorddán ahte Statkraft čilge mo sii áigot meannudit olmmošvuoigatvuođaid ja álgoálbmotvuoigatvuođaid ektui, dadjá Muotka.

– Stáhta fitnodahkan Statkraftas lea erenoamáš ovddasvástádus. Statkrafta searvan Fovsen Njaarke-áššái ii atte stuorra luohttámuša. Sii fertejit čájehit mo sii háliidit eastadit ahte mii oažžut ođđa Fovsen Njaarke-ášši Norgii, dadjá sámediggepresideanta.

– Buot fitnodagat mat háliidit hukset sámi guovlluide fertejit diehtit gos sii leat ja sis fertejit leat standárddat mat unnidit sin rihkkunriskka olmmošvuoigatvuođaid ektui. Statkraft berre čuovvut Sámedikki njuolggadusaid rievdaduvvon meahccegeavaheami várás, mat gustojit buot areálasisabahkkenáššiide Finnmárkkus, dadjá Muotka.