Oahpponeavvuid ráhkadeami doarjjaortnega bokte juolluda Sámediggi 384 950 ruvnno doarjaga Čálliidlágádus AS:i, ođđa oahpponeavvuid ráhkadeapmái davvisámegillii ja lullisámegillii. 

Prošeavtta áigumuš lea muitalusaiguin maid lea álki lohkat ja mat boktet beroštumi, nannet nuoraid lohkanhárjehallama ja movttiidahttit sin lohkat.

Girjjit galget leat heivehuvvon nuorra lohkkiide ja dahkat lohkama buorren vásáhussan, dainna lágiin ahte girjjiin leat miellagiddevaš muitalusat ja hápmi mii lea heivehuvvon ulbmiljovkui.

– Áibbas dehálaš lea ahte mánáin leat buorit ja áigeguovdilis oahpponeavvut iežaset gillii. Prošeakta nanne sámi nuoraid lohkanmovtta ja giellagelbbolašvuođa, ja dat lea hui buorre, dadjá sámediggeráđđi Ann-Elise Finbog (SáB).