Boazodoallošiehtadallamat leat jahkásaš šiehtadallamat gaskal Stáhta ja boazodoalloealáhus ealáhusšiehtadusa birra. Norgga boazosápmelaččaid Riikkasearvi (NBR) lea boazodoalu šiehtadallanbealálaš. Sámediggái lea addojuvvon vejolašvuohta buktit cealkámuša 2025/2026 boazodoallošiehtadussii ovdal go šiehtadallamat álget.
– Dálkkádatrievdamat ja luondu mii lea rievdame buvttihit mearkkašahtti hástalusaid. Bohccuide ii leat ealáhat jikŋon guohtumiid dahje gassa muohttaga dihte, jávrrit eai galbmo ja dagaha vahátlaš váikkuhusaid bohccuide go johtet. Lea dehálaš ahte boazodoallu lea ráhkkanan birgehallat daiguin hástalusaiguin mearrediđolaš doaibmabijuiguin ja nannejuvvon heahtegearggusvuođain, lohká Sámediggepresideanta Silje Karine Muotka (NSR).
Sámediggepresideanta čujuha ahte ealáhus lea heivehannávccalaš. Muhto ahte dálke- ja dálkkádatrievdamat, ja lassánan várra oažžut parasihtaid ja skihpat, gáibida jođánis nuppástuhttima ja mielddisbuktá lassibarggu ja lihkohisvuođavára. Sámediggi oaivvilda danin ahte heahtegearggusvuođafoanda ferte nannejuvvot.
Sámedikki cealkámuša galgá dievasčoahkkin meannudit ja sáddet Eanadoallo- ja biebmodepartementii. Dievasčoahkkin galgá meannudit cealkámuša gaskavahku juovlamánu 4. beaivvi.
Da leat Sámedikki vuoruheamit:
- Dálkkádatrievdamat, biras ja heahtegearggusvuođafoanda
- Sihkkarastit boazodoalu areálaid
- Bagadus, máhtto- ja kapasitehtahuksen
- Kultuvrralaš guottehahttivuohta ja bearašvuđot boazodoallu
- Árbevirolaš máhttu
Boazodoalloareálaid unnun fuolastuhttá Sámediggeráđi, vaikko boazodoalloareálaid sihkkarastin leage boazodoalloeiseválddiid guovddáš bargosuorgi.
– Sámediggi oažžu máŋga veahkkeohcama areálaáššiid oktavuođas, ja boazodoallit geat vásihit deattu juohke guovllus, earenoamážit industriijahuksema oktavuođas, váldet oktavuođa minguin. Boazodoalloealáhus dárbbaša kapasitehta ja gelbbolašvuođa vai sáhttá oassálastit dáidda proseassaide. Mii háliidit danin ahte eiseválddit vuoruhit dan boahtte boazodoallošiehtadusas. Šiehtadusbealit berrejit soahpat doaibmabijuid ja ruhtadeami eastadan dihte areálamassimiid ja doarjun dihte boazodoalu areálasisabahkkenáššiin, dadjá Muotka.
Earret cealkámuša addima šiehtadussii, oassálastá Sámediggi maiddái goziheaddjin šiehtadallamiin.