– Sámediggeráđđi lea beahtahallan go lea nu unnán ipmárdus hástalusaide maid “mer av alt” gáibádus mielddisbuktá sámi kultuvrra ja ealáhusdoaimmaheami luondduvuđđui. Mii eat dál dárbbat johtileappot ja eanet juohke diŋggas, muhto baicca eanet dássedis ja jierpmálaš válljejumiid energiijapolitihkas ovddasguvlui, dadjá sámediggeráđđi Maja Kristine Jåma (NSR).

Sámediggeráđđi fuolastuvvá erenoamážit Energiijakommišuvnna váilevaš ipmárdusa ja beroštumi geažil fuolahit sámi kultuvrra ja ealáhusaid luondduvuođu elfápmohuksemiid oktavuođas. Sámediggeráđđi Jåma oaidná ahte šaddá hui gáibideaddji lasihit bieggafápmohuksemiid sámi guovlluin váikkuhusaid dihte mat das sámi kultuvrra ja ealáhusa areálavuđđui.

Cealkámušas Sámediggi imašta earret eará evttohusa mas árvaluvvo čielggadit movt galgá sihkkarastit prosessuála njuolggadusaid, mat fuolahit álgoálbmogiid vuoigatvuođaid ja mat seammás vuhtiiváldet váráiduhttinsihkarvuođa, dálkkádatmihtuid ja fápmodárbbuid.

– Mis leat juo prosessuála njuolggadusat, lea máhttu ja njuolggadusaid doahttaleapmi mii váilu. Nubbi ášši lea maiddái árvvoštallat goas álgoálbmotkultuvrra dahje álgoálbmotealáhusaid rádji lea olahuvvon areálagáržžidemiid dáfus. Nu go Fovsen Njaarke-ášši duopmu lea cealkán, de leat rájit dasa man ollu álgoálbmotealáhusat girdet. Stáhtat eai sáhte dáid rájiid rihkkut váikkuhusaid haga, dadjá Jåma

Energiijakommišuvnna raporttas leat evttohusat energiijaseastimii ja -beavttálmahttimii. Sámediggeráđđi oaivvilda ahte ii leat leamaš doarvái gulahallan dán oasi birra raporttas.

– Energiija, nu go eará resurssat, boahtá leat ráddjejuvvon boahtteáiggis. Danne oaivvildan mun ahte Energiijakommišuvdna lea lokten ovdan dehálaš momeanttaid energiijaseastima dáfus sihke ealáhuseallimis ja báikedoalus. Daid galggašii vuoruhit, loahpaha Jåma.

Loga Sámedikki cealkámuša dán guorahallamii. (PDF, 256 kB)

Dáppe sáhttet buohkat buktit cealkámušaid (regjeringen.no).

Cealkináigemearri lea maŋŋebargga miessemánu 2. beaivvi.