Láhkaevttohus lea leamaš gulaskuddamis ja áigemearri lei golggotmánu 1. b. 2024. Láhkaevttohusas gieđahallojuvvojit fáttát boazodoalu siskkáldas organiseren, boazodoallolága buhtadusmearrádusat ja boazodoalu vejolašvuohta beassat eananjuohkindiggái siskkáldas dilálašvuođain. Hurdalsplattformenis čuovvu ahte ráđđehus áigu ollislaččat ođasmahttit boazodoallolága. Boazodoalloláhka ii leat dattetge ollislaččat ođasmahttojuvvon dás.
– Sámediggi lei vuordán ollislaš ođasmahttima lágas, muhto nu ii šaddan. Vaikko dat lei Sámedikki vuolggasadji, de leat dán láhkaevttohusas bealit mat buoredit boazosápmelaččaid dili. Vuosttažettiin háliidan čujuhit rievdadusaid buhtadusnjuolggadusain, go dál viimmat rievdaduvvo láhka Alimusrievtti Femund-duomu mielde. Dát lea hui buorre, ja lea juoga masa leamaš dárbu guhkká, dadjá sámediggepresideantta Silje Karine Muotka, ja joatká:
– Háliidan maid čalmmustahttit ahte evttohus mielddisbuktá ahte boazodoallu beassá eret dan dilis gos geahpedeapmi gorrelogu mielde lea šaddan váldonjuolggadussan riektegeavahusa dihtii. Lea maid buorre ahte siiddaoassi gávpegálvun gáržžiduvvo, ja maiddái ahte orohaga jahkečoahkkin šaddá alimus orgánan orohagas.
Sámediggi ja Norgga Boazosápmelaččaid Riikkasearvi (NBR) nammadedje golggotmánu 29. b. 2018 sámi almmolaš láhkalávdegotti mii galggai geahčadit lea go dárbu rievdadit dálá boazodoallolága. Nammadeami duogáš lei ahte gustovaš boazodoalloláhka lei ollu rievdaduvvon ovttaskas mearrádusaid hárrái. Sámediggi ja NBR oidne dárbbu ollislaččat ođasmahttit lága. Boazodoalloláhkalávdegoddi bijai ovdan iežas evttohusa rievdadit boazodoallolága čakčamánu 12. b. 2022. Láhkalávdegoddi deattuhii earret eará álbmotrievttálaš suodjaleami, nannejuvvon areálasuodjaleami, priváhtarievttálaš suodjaleami, kultuvrra, árbedieđu nannema ja almmolaš hálddašeami rievdadeami. Sámedikki dievasčoahkkin meannudii ášši njukčamánu 8. b. 2023. Sámedikki dievasčoahkkin mearridii ahte Sámediggi gáibida ollislaš reviderema boazodoallolágas, ja ahte Sámediggi váldoáššis lei mielas lávdegotti evttohussii.
Sámedikkis ja Eanadoallo- ja biebmodepartemeanttas leat leamaš máŋga konsultašuvnna. Konsultašuvnnat álggahuvvoje čakčat 2023, ja loahpahuvvoje juovlamánus 2024. Sámedikki oaidnu konsultašuvnnain lea leamaš ahte boazodoalloláhka galgá ollislaččat ođasmahttojuvvot. Sámediggi evttohii nuppádassii čuovvovaš fáttáid revideremii; ulbmilmearrádus, boazodoalu siskkáldas organiseren ja olgguldas almmolaš hálddašeapmi, boazodoalloareálaid sihkkarastin, ja boazodoalu buhtadusovddasvástádus. Konsultašuvnnaid bokte sohppojuvvui vuoruhit fáttáid boazodoalu siskkáldas organiseren, boazodoalu buhtadusovddasvástádus ja boazodoalu vejolašvuohta beassat eanajuohkindiggái viidáset barggus.
Sámedikki ja NBR boazodoalloláhkalávdegotti evttohusa mielde, ja Sámedikki dievasčoahkkima mearrádusa mielde áššis 007/23, lea Sámediggi konsultašuvnnain maiddái váldán ovdan dakkár fáttáid nu go areálasuodjaleami, ovdagihtii mieđiheami bággolotnunáššiin, ulbmilmearrádusa ja olgguldas hálddašeami. Máŋga gulaskuddanásahusa váillahit ođasmahttima seamma fáttáin, ja ollislaš ođasmahttima lágas.
Ealáhus- ja kulturlávdegoddi galgá meannudit Sámedikki oainnu evttohuvvon rievdadusaide boazodoallolágas ja eanajuohkolágas 9. vahkus. Ášši digaštallojuvvo viidáseappot Sámedikki dievasčoahkkimis gaskavahku njukčamánu 12. beaivvi.
Áššebáhpirat: Dokumeanta 25/2419 - Boazodoallolága rievdadusevttohus ja gullevaš rievdadusevttohusat eananjuohkinlágas - Sametinget