Finnmárkkulága paragráfa 4 mielde sáhttá Sámediggi bidjat njuolggadusaid dasa movt Finnmárkoopmodat ja almmolaš eiseválddit galget árvvoštallat makkár váikkuhusat rievdaduvvon meahccegeavaheami mearrádusain lea sámi kultuvrii, boazodollui, meahcásteapmái, ealáhusbargui ja servodateallimii.

Sámedikki dievasčoahkkin mearridii ođđa njuolggadusaid oktan mearkkašumiiguin juovlamánus 2020 ja das ledje njuolggadusat čiežain paragráfain, man čuvvo vuđolaš ja čilgejeaddji mearkkašumit. Njuolggadusaid galgá Finnmárkolága mielde Gielda- ja guovlodepartemeanta dohkkehit. Departemeanta ii dohkkehan njuolggadusaid. Danne leat njuolggadusat fas ođđasit reviderejuvvon dál. 

Silje Karine Muotka Árvu/Sámediggi

– Dat árvalus maid sámediggeráđđi dál ovddida Sámediggái lea kompromissaevttohus. Mii leat geahččalan vuhtiiváldit departemeantta máhcahagaid, ja gulahallama bokte departemeanttain mii leat dahkan ođđa árvalusa mii dál ovddiduvvo politihkalaš meannudeapmái, dadjá sámediggepresideanta Silje Karine Muotka (NSR).

Danne leat ovdamearkka dihte mearkkašumit váldon eret ođđa árvalusas, nu ahte leat dušše njuolggadusat maid Sámedikki dievasčoahkkin galgá dohkkehit, ja maŋŋel dievasčoahkkinmearrádusa maiddái departemeanta.

Sámediggeráđđi lea maiddái muhtin muddui váldán vuhtii departemeantta mearkkašumiid njuolggadusaid sátnádeapmái, ja leat dahkkon gielalaš justeremat nu ahte ii leat eahpádusge mii boahtá ovdan eará lágain. Dat lea dahkan ahte ođđa njuolggadusaid árvalusas leat veahá eanet sánit. Departemeantta árvalusa mielde leat maid váldon mielde čujuhus sámelága ođđa konsultašuvdna kapihttalii. Njuolggadusaid sátnádeapmi lea muhtin čuoggáin rievdaduvvon nu ahte Fovse-duomu sisdoallu, mii bođii maŋŋel mannan dievasčoahkkinmearrádusa, čielgasit speadjalastojuvvo njuolggadusain.

Sámedikki dievasčoahkkin meannuda ášši duorastaga geassemánu 8. beaivvi.

Loga áššeovddidusa áššis 026/23 Ođasmahttin - Sámedikki njuolggadusat rievdaduvvon meahccegeavaheapmái