– Addá movtta oaidnit sin plánaid. Sámediggi nannii eanandoalloáŋgiruššama jagis 2025 ja dál oaidnit bohtosiid. Mii oaidnit ahte boanddat sakka barget ovdánahttit ja nannet sámi eanandoalu. Ii leat sáhka dušše visttiin – muhto boahtteáiggedoaivagis, ceavzilvuođas ja ealli báikegottiin, dadjá sámediggeráđđi Elisabeth Erke (Gb).

OĐĐA NÁVEHAT: Doarjja Sámedikkis manná ođđa visttiide ja divodemiide. Čájehusgovva. Jan Erik Johnsen

Jagis 2025 rievdaduvvojedje njuolggadusat doarjjaortnegis eanandoalu, gilvvagárdedoalu ja vuovdedoalu várás. Dasa lassin lasihuvvui ruhta doarjjapostii, nu ahte dat šattai 4,25 miljovnna ruvnno. Dat ruhta lea fargga buot juolluduvvon. Ohcamat leat dađistaga meannuduvvon, ja maŋemus juolludusat leat dál válbmasat.  

– Jagis 2024 juolludeimmet dušše 957 000 ruvnno doarjaga oktiibuot ja dan ektui leat dán jagi boahtán hui ollu ohcamat, mii lea hui buorre. Sámediggi veahkeha ovdánahttit boanddaid, vuovdedolliid ja gilvvagárdedolliid, dadjá Erke.

Dán vuoro ožžot dát boanddat doarjaga:

• Erik Johansen, Sarvvesvuonas Porsáŋggus, oažžu 600 000 ruvnno ođđa vistti huksemii ja doaibmavisttiid ođasteapmái. Ohcamis čállá ahte ferte ođastit visttiid go lea lasihan kvohta ja dárbbaša eambbo omiid.
• Stig Arve Eriksen, Buolbmágis, oažžu 600 000 ruvnno ođđa doaibmavistti huksemii mielkebuvttadeami várás. Ohcamis čállá ahte son lea dat maŋemus geas lea mielkedoallu guovllus, ja háliida hukset ođđa vistti deavdin dihte dálá ja boahttevaš gáibádusaid.
• Nils Petter Blomstereng, Fiervvás, oažžu 600 000 ruvnno ođđa vistti huksemii. Ohcamis čállá ahte dat veahkeha bisuhit mielkebuvttadanhivvodaga Romssas.
• Ole Muosat, Deanus, oažžu 280 000 ruvnno ođđa buđetvuorkká huksemii. Son čállá ohcamis ahte lea álggahandásis ja háliida álggahit máŋggabealat smávvaskála buvttadeami.
• Øystein Fossmo, Ivgomuotkkis, lea ožžon 456 000 ruvnno sávzanáveha divodeapmái. Ohcamis čállá ahte ulbmil lea sihkkarastit buori elliidčálggu ja fuolahit ceavzilvuođa vai boahttevaš buolvvat háliidit doalu váldit badjelasaset.