– Mii leat buktán cealkámušaid dán birra buot proseassain ja máŋggain konsultašuvnnain Máhttodepartemeanttain. Danin lea hui movttiidahtti oaidnit ahte min gelbbolašvuođaovdánahttinbargu ollašuvvá, ja ahte mánáidgárddiid ja skuvllaid lassi- ja joatkkaoahppolávdegoddi doarju min cealkámušaid ja evttoha dán doaibmabidjun, dadjá sámediggeráđđi Mikkel Eskil Mikkelsen (NSR).
Mikkelsen dadjá sámediggeráđi leat oaidnán ahte báikkálaš gelbbolašvuođaloktenortnet ii doaimma. Ii geasge leat oppalaš bajilgovva das, makkár báikkálaš dárbbut sámi mánáidgárdesektoris leat ja makkár gelbbolašvuođafálaldat leat fállojuvvon ja fállojuvvojit.
Servvodagas lea dál gelbbolašvuođakriisa ja servvodagas váilot fágaolbmot. Dát guoská maiddái sámi mánáidgárdesektorii miehtá riikka. Mánáidgárdeeaiggádiidda lea hástaleaddji rekrutteret ja doalahit sámegielat bargiid, go sii leat bivnnuhat oppalaš bargomárkanis. Čájehuvvo ahte mánáidgárdesektora bálkádássi ii nákce gilvalit dán márkanis.
– Dát dilli váikkuha negatiivvalaččat mánáidgárddi sámi sisdoalu kvalitehtii. Sámediggi vuorjašuvvá go dát dilli dagaha dan, ahte sámi mánáid rievttit sámi mánáidgárdefálaldahkii, man vuođđun lea sámegiella ja sámi kultuvra, ii ollašuva. Dát lea čielga áitta sámi mánáid riektesihkarvuhtii. Danin Sámediggi vuoruha bargat nu, ahte rámmat ja struktuvrrat sámi mánáidgárddiin ja eará mánáidgárddiin main lea sámegiel fálaldat, heivehuvvojit mánáidgárddiid dárbbuid vuođul, dadjá Mikkelsen.
Duorastaga dán vahkus gieđahallá Sámedikki dievasčoahkkin sámediggeráđi čilgehusa kvalitehtaovdánahttima birra sámi mánáidgárdesektoris. Okta Sámedikki doaibmabijuin lea heivehit Sámedikki doarjjaortnegiid nu, ahte dat ovddidit gelbbolašvuođa. Sámediggi árvvoštallá galgágo gáibidit ahte mánáidgárddit, mat ožžot doarjaga, galget čuovvut gelbbolašvuođaloktendoaibmabiju ja systematiseret giellabarggu gievrras giellamodeallaid vuođul.
Áššebáhpirat áššái 38/22 Sámediggeráđi čilgehus kvalitehtaovdánahttima birra sámi mánáidgárdesektoris
Mánáidgárddiid ja skuvllaid lassi- ja joatkkaoahppolávdegoddi lea čakčamánu 28.b 2022 doaimmahan čielggadeami NOU 2022: 13: Med videre betydning – Et helhetlig system for kompetanse- og karriereutvikling i barnehage og skole Máhttodepartementii, mas evttohit máŋga doaibmabiju ásahan dihtii ollislaš ja bissovaš vuogádaga mánáidgárddiid ja skuvllaid gelbbolašvuođa- ja karriearaovddideami várás.
Jearahallama ja gažaldagaid oktavuođas, váldde oktavuođa sámediggeráđiin Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no