— Lean behtohallan stáhtabušeahtain go oainnán ahte ráđđehus áigu duođas vuolidit juolludeami Sámediggái. Biehttalit Sámediggái measta ollásit bálká- ja haddegoargŋuma, mearkkaša biehttalit measta buot dábálaš sápmelaččaide geat barget sámi gielain ja kultuvrrain bálkálassáneami 2023:s. Dát lea vealaheapmi, dadjá sámediggeráđđi Runar Myrnes Balto (NSR).

Myrnes Baltos lea ovddasvástádus Sámedikki bušehttii. Sámedikki ekonomalaš dilli šaddá gáibideaddji ovddasguvlui, erenoamážit go Sámediggi juohká 2/3 bušeahtas sámi institušuvnnaide ja servodahkii.

— Ollugat eai ipmir ahte measta buot sámi kultur- ja giellabargu lea Sámedikki bušeahta duohken. Sámedikki bušeahta njiedjan váikkuha olles sámi servodahkii, ja bargu cegget fas dan maid stuorraservodat rivvii mis dáruiduhttinpolitihka bokte, dadjá Myrnes Balto.

Okta dain sajiin gos ráđđehus čuohppá lea sámi oahponeavvuin, čuohppá 9 miljovnna ruvnno.

— Ráđđehus govahallá dego livččii lasiheame bušeahta 4 proseanttain Sámediggái, muhto dát gal dušše dájuha go seammás čuohppá 9 miljovnnain oahpponeavvuin. Mearkkaša ahte sámi mánát eai oaččo seamma vejolašvuođa go dárogielat mánát, ja dat čuohcá erenoamážit digitála oahpponeavvuid buvttadeapmái.

Myrnes Balto muittuha ahte dát ráđđehus lea lohpidan fápmorahčama sámi giela ovddas ja sámi kulturloktema.

— Ráđđehus rihkku iežas lohpádusaid sámiide, ja sámit eai duđa dasa. Govvideaddjin dasa lea go Sámedikkis lea 2023:s bušeahttarámma 590 miljovnna ruvnno, buohtastahtton Norgga Operain ja Baleahtain mii oažžu 705 miljovnna ruvnno. Dat gal berre buohkaid hehppehit, loahpaha Myrnes Balto.