Lávdegoddi galgá leat veahkkin proseassas mas čielggadit mariidna suodjalusa guovllus.

Fásta áirrasin leat nammaduvvon:

• Ragnhild Oline Eliassen (várreáirras Ann Britt Birkeli)
• Ronny Wilhelmsen (várreáirras Ulf K. Eriksen)
• Berit Thomassen (várreáirras Mona Henriksen)
• Øyvind Lindbäck (várreáirras Ove Stødle)
• Andrea Klemetzen Domaas (várreáirras Mariell Haugli)

Dasa lassin oažžu sámi guolástusorganisašuvdna Bivdu vejolašvuođa ieš nammadit guđat sámi áirasa bargolávdegoddái. 

– Bargolávdegottis lea nanu sámi ovddastus nammadeami maŋŋel, mii bures dovdá ja diehtá Porsáŋgguvuotna árbevirolaš geavaheami birra, dadjá sámediggeráđđi Jon-Christer Mudenia ja joatká:

– Bivddus lea lunddolaš sadji lávdegottis, organisašuvdnan mas lea nanu čanastat sámi guolástanárbevirrui, dadjá son.

Romssa ja Finnmárkku stáhtahálddašeaddji lea ožžon bargun čielggadit mariidna suodjalusa Leavdnjavuonas. Bargolávdegotti čoahkkádus lea Sámedikki ja Stáhtahálddašeaddji konsultašuvnnaid boađus. Sámediggái lea leamaš hui dehálaš ahte lávdegottis lea čielga báikkálaš ja sámi ovddastus. 

– Jus guovlu galgá suodjaluvvot, de fertejit báikki olbmot dan doarjut, ja suodjalusmearrádusat fertejit vuhtiiváldit árbevirolaš mearrasámi geavaheami ja álgoálbmotmáhtu. Sávan nammaduvvon áirasiidda lihku bargguin, loahpaha Mudenia.