– Ovttasbargošiehtadusat leat buktán bohtosiid maid mii oaidnit árgabeaivvis. Mii oaidnit ahte ollu gielddat duođaid háliidit leat mielde addimin buoret bálvalusaid sápmelaččaide, muhto dálá šiehtadusain sáhttá leat menddo loažža hápmi. Dál mii fertet daid buoridit vai dain livčče vel eanet vuoibmi, dadjá sámediggepresideanta Silje Karine Muotka (NSR).
Ovttasbargošiehtadusat leat deaŧalaš reaidun sihkkarastit ahte sápmelaččat ožžot daid bálvalusaid ja vuoigatvuođaid maidda sis lea vuoigatvuohta. Evalueren, man Visjona lea čađahan, čájeha ahte šiehtadusat leat nannen sámi áššiid máŋgga suohkanis. Seammás čájehuvvo ahte lea eahpedássedis čuovvoleapmi, ja ahte dávjá lea eahpečielggas geas lea ovddasvástádus masa.
Loga ovttasbargošiehtadusaid evaluerema
Oassin Duohtavuođa- ja soabahankommišuvnna raportta čuovvoleamis bargá Sámediggi kártet ja nannet regionála čatnaseami sámi gillii ja kultuvrii. Dat mearkkaša čielgaset ovddasvástádusa, buoret čuovvoleami ja systemáhtalaš lahkoneami sámi gillii ja kultuvrii almmolaš bálvalusain. Danne mii bovdet buot min ovttasbargoguimmiid searvat dán bargui.
– Ulbmil lea ahte buot sápmelaččat galget oažžut sámegiel fálaldagaid dohkálaččat lahka, ja mis lea divodanbargu guovddážis ovttasbargošiehtadusaid barggus. Mii fertet sihkkarastit ahte ovttasbargu šaddá eanet systemáhtalaš ja vuođđuduvvon geavahussii, dadjá Muotka.
Árvvoštallan čujuha guovtti vejolaš modellii boahttevaš šiehtadusaide. Nubbi čuovvu dálá vuogádaga, mas šiehtadusat leat čadnojuvvon konkrehta bálvalussurggiide. Nubbi ges lea eanet ollislaš ja huksejuvvo viidábut áŋgiruššansurggiide surggiid rastá.
– Deháleamos lea ahte soahpamušat duođaid doibmet olbmuide. Sámediggi áigu geavahit dán árvvoštallama sihkkarastit ahte ovttasbargu suohkaniiguin šaddá eanet ulbmillažžan, čielgaseabbon ja dárkileabbon. Mii háliidat gávdnat buoremus čovdosiid ovttas suohkaniiguin ja fylkkaiguin geain lea ovttasbargošiehtadus minguin dahje háliidit oažžut dakkára, loahpaha Muotka.
Beaiveálgu-julggaštusas, áigodaga politihkalaš stivrenlávddis, lea vuoruhuvvon nannet ovttasbargošiehtadusaid suohkaniiguin, fylkkaiguin ja eará orgánaiguin main lea ovddasvástádus bálvalusain sámi álbmogii. Ovttasbargošiehtadusat čuovvoluvvojit jeavddalaččat ja ovdanbuktojuvvojit jahkásaččat Sámedikki dievasčoahkkimii.
Árvvoštallama meannuda Sámedikki plána- ja finánsalávdegoddi lávdegoddečoahkkimis dán vahkus, ja Sámedikki dievasčoahkkimis duorastaga njukčamánu 13. beaivvi 2025.
Áššebáhpirat:
011/25 Sámedikke árvustallam aktisajsbarggosjiehtadusásj stáda- ja fylkkasuohkanij
011/25 Sametingets evaluering av samarbeidsavtaler med by- og fylkeskommuner