Otná sámi nuorain leat eará bajásšaddaneavttut go maid buolvvat ovdal sin leat vásihan. Sis leat rievttit oahppat gielaset ja kultuvrraset birra. Ollugat leat fuomášan ahte sin duogážis lea árvu. Sápmelašvuohta beassá ahtánuššat.

Sápmelašvuođa ahtánuššan buktá maid hástalusaid. Muhtin sámit vásihit garra cuiggodemiid ja maiddái áitagiid go čájehit sin duogáža, ja erenoamážit jus loktejit oaivviliiddiset sámi áššiid birra almmolašvuhtii. Sosiála mediain cielahuvvojit sápmelašvuođaset dihte. Dát čuohcá nuorra olbmui.

Cuiggodeamit ja badjelgeahččanvuohta, sisabáhkkemat mat áitet min árbevirolaš ealáhusaid, fasttet ja unohas sátnelonohallamat median, ja soađit ja eahpesihkkaris dilli máilmmis lea šaddan árgabeaivin. Mis leat váikko man ollu ovdamearkkat maid sáhttit namuhit. Fovsen-ášši lea okta dakkár. Sámi nuorat leat čájehan vuosteháguset go Norgga stáhta ii doahttal alimusrievtti duomu. Mii dáhpáhuvvá? Na ii mihkkege. Boazoealáhus hiddjiduvvo ja garuhuvvo goazahussan buot ovdáneapmái davviguovlluin. Ja dál go válgagižžu suohkanválgga oktavuođas lea álggahuvvon, de geavahuvvo vuosteháhku sámiide ja sápmelašvuhtii válgaseaktin. Buot dáid galget min nuorat oaidnit ja gierdat. Dat ii soaitte álo gierdamis.

 Olbmo eallin ii leat goassege ovttageardán, ja nuorra olbmo eallimis dáhpáhuvvet dávjá rievdamat jođáneappot. Dat sáhttá rievddadit buori dilis hástaleaddji dillái čalbmeravkaleamis.  Gaskkohagaid sáhttá dovdat ahte eallin lea nu lossat ahte ii leat eallinveara. Muhtimat válljejit guođđit dán máilmmi. Dákkár dilis lea dárbu ahte muhtin astá gullat ja oaidnit olbmo ovdal go lea beare maŋŋit. Muhtin gii diehtá makkár hástalusaiguin nuorat rahčet, ja gii dovdá sápmelašvuođa ja máhttá sámegiela.

Girku SOS lea riikka stuorimus birrajándora heahtebálvalus telefovnna ja interneahta bokte. Singuin sáhttá váldit oktavuođa jus eallin lea lossat ja livččii dárbu geainna nu háleštit. Girko SOS:s barget eaktodáhtolaččat, ja singuin sáhttá gulahallat dárogillii ja davvisámegillii. Sámedikki sávaldat lea ahte dát fálaldat maiddái šaddá julev- ja lullisámegillii. Dat veahkehivččii sámiid miehtá Norgga váldit oktavuođa bálvalusain iežaset gillii. Mii diehtit ahte go olbmos lea duohta heahti, dalle gulahallá buoremusat iežas gillii. Go beassá gulahallat olbmuin gii máhttá sámegiela ja geas lea sámi duogáš dehe dovdá sápmelašvuođa bures, de ii leat dárbu čilget daid beliid ságastaladettiin. Dat gilvá oadjebasvuođa ja sáhttá gádjut heakka.

Sámedikki skeaŋka ruvdnoprinsabára 50 jagi ávvudeami oktavuođas galgá mannat nannet Girko SOS sámegielat bálvalusa.