Sámediggi ovddida prinsihppacealkámušas man Sámedikki dievasčoahkkin meannuda geassemánus, čielga vuordámušaid ráđđehusa suodjalus- ja sihkarvuođapolitihkkii. Sámediggi deattuha ahte álgoálbmotvuoigatvuođat gustojit maiddái dalle go sihkarvuođapolitihkalaš dilit rivdet.

– Sápmelaččain lea álgoálbmogin vuoigatvuohta ovdánahttit iežaset giela, kultuvrra ja servodateallima. Dat maiddái guoská sihkarvuođapolitihkalaš vuoruhemiid oktavuođas. Mii háliidit leat nanu ja oadjebas ovttasbargoguoibmi, muhto vuordit Norgga eiseválddiid dohkkehit min vuoigatvuođaid ja min searvvahit mearridanproseassaide mat gusket sámi guovlluide, dadjá sámediggepresideanta Silje Karine Muotka.

Sámediggi doarju Norgga suodjalusa ja gearggusvuođa nannema, muhto oaivvilda dan fertet dahkkojuvvot nu ahte ii gáržžit eambbo sámi guovlluid ja nu ahte dat ii vahágahte sámi kultuvrra ja ealáhusdoaimmaid.

– Militearadoaimmaid lassáneami olis sámi guovlluin fertejit leat čielga njuolggadusat gulahallama birra ja sámi diliid dáfus, dadjá Muotka.

Sámediggi maiddái fuomášuhttá ahte sámi giela ja kultuvrra lea dárbbašlaš vuhtiiváldit gearggusvuođas ja heahtedili dustemis. Dat lea mearrideaddji mávssolaš vai fuolahuvvo ahte buot olbmot ožžot dehálaš dieđuid heahtedilis. Dasto Sámediggi deattuha ahte sápmelaččain lea gelbbolašvuohta mii lea dehálaš Suodjalussii.

Sámedikki cealkámušas leat earret eará dát vuordámušat:

• Sámi beroštusat fertejit váldojuvvot vuhtii suodjalusa plánemis ja militearadoaimmain.
• Sámediggi galgá konsulterejuvvot buori jáhkus doaibmabijuid birra mat sáhttet váikkuhit sámi servodahkii ja kultuvrii.
• Militearabargit ožžot oahpahusa sámi kultuvrra ja vuoigatvuođaid birra.
• Stáhta ovddida sámi ásahusaid ja organisašuvnnaid kapasitehta nannema.

Loga olles ášši dás