– Ovdánahttinplána ii čoavdde duođalaš sisabahkkemiid ja Sámedikki vuostecealkámuš lea ain fámus. Vuđolaš váttisvuođat, kritihkalaš areálaid massin ja váilevaš čielggadeamit sámi meahccegeavaheamis leat seamma duođalaččat dál go ovdal. Dat ahte NČE dál gáibida lassičielggademiid gitta 2027 rádjai min vuostecealkámuša geažil, čájeha ahte ášši ii leat loahpalaččat meannuduvvon.
Sámediggi ovddidii ođđajagimánus 2025 formálalaš vuostecealkámuša 420 kV-linnjái Davvesiida-Sáttovárri. Mudenia deattuha ahte áigumuš jođáneappot ovdánit ii galgga čuohcat sámi vuoigatvuođalaččaid riektesihkarvuhtii.
– Energiijaministtar namuha ahte konsešuvdnaproseassa ferte vuhtiiváldit kulturmuittuid ja sámi beroštumiid. Dat lea buorre, ja mii vuordit ahte dát eai leat dušše guoros sánit. Min vuostecealkámuš lea čielggas, plánejuvvon transformáhtorstašuvdna Sáttováris dagaha dohkkemeahttumis sisabahkkema maid ii sáhte beavttálmahttit eret čavgadis áigetávvalis.
Sámediggeráđđi lea maid fuolastuvvan dan deattu geažil mii dál biddjojuvvo guoskevaš orohagaide ja meahcásteddjiide. Prošeakta sáhttá giddet kritihkalaš johtingeainnuid ja dagahit ahte masset ollu dálveguohtumiid.
– Mii vuordit ahte vuoigatvuođalaččat, sihke báikkálaš dáluolbmot ja guođohanealáhus, ožžot gokčojuvvot liigegoluid áššemeannudeami ja huksema oktavuođas.
Sámediggi deattuha ahte Nuorta-Finnmárkku ealáhuseallimii boahtá ávkin go dál vuoruhit ođasmahttit dálá 132 kV-fierpmádaga, ja ahte dat lea buorre.
– Ovdánahttinplána čájeha ahte dálá linnjáid temperaturbuorideapmi addá saji 100 MW ođđa geavaheapmái ja 150 MW ođđa buvttadeapmái juo jagi 2032:s. Dát lea mearkkašahtti kapasitehtalassáneapmi mii addá Nuorta-Finnmárkku ealáhuseallimii vejolašvuođaid ahtanuššamii ja ođđa bargosajiide, ja dat dáhpáhuvvá guokte jagi árabut go plánejuvvon 420 kV-linjá. Ođasmahttin sihkkarastá fámu báikkálaš ealáhusaide almmá min hearkkimus luonddu ja kulturárbbi billisteami haga.
Sámediggi áigu dárkilit čuovvut viidáset konsešuvdnameannudeami ja deattuha ahte NČE váldá vuhtii váilevašvuođaid máhttovuođus sámi meahccegeavaheami ja kulturmuittuid birra.
Loga maid artihkkala ráđđehusa neahttabáikkis dan birra ahte energiijadepartemeanta lea ožžon NČE ja Statnett ođđa energiijainfrastruktuvrra ovdánahttinplána Finnmárkkus: Plan for nettutvikling i Finnmark gir muligheter for økt kraftforbruk