Searvama ulbmil lea ovdánahttit ja oainnusmahttit SDG organisašuvdnan, ja čájehit sámi dáiddáriid bargguid riikkaidgaskasaš gehččiide. 

SDG lea bovdejuvvon Litauenii leat mielde Art Vilnius 2024 prográmmas, ovdánahttin dihte pilohtaprošeavtta «Performance Studies in Sápmi».  

– Mii leat ilus go sáhttit doarjut Sámi Dáiddaguovddáža pilohtaprošeavtta 'Performance Studies in Sápmi'. Prošeakta ovddida sámi dáidaga riikkaidgaskasaš arenas. Lea dehálaš ahte sámi dáiddárat oidnojit dakkár lávddiin vai ožžot fuomášumi riikkaidgaskasaččat ja vai min kulturárbi ovddiduvvo, dadjá sámediggeráđđi Maja Kristine Jåma. 

Art Fair Vilnius lágiduvvo golggotmánu 4.–6. beivviid 2024, ja dáiddárat geat servet leat dánsejeaddji Ánna-Katri Helander, šuokŋadahkki Anthoni Hætta, designer ja duojár Ann-Sofie Kallok, Maret Anne Sara bargguin «Suoidnekaboom», neavttár Anja Saiva Bongo Bjørnstad, neavttár Anitta Katariina Suikkari, govvadáiddár Li Taiga ja koreográfa Alexander Wingate. 

140 000 ruvdnosaš doarjja juolluduvvo ásahusovddideami doarjjaortnegis.