Maja Kristine Jåma
Åse M. P. Pulk/Sámediggi
Sámediggeráđđi Jåma deattuhii ahte dáiddadieđáhusas leat dehálaš doaibmabijut mat bohtet sámi dáidda- ja kultureallimii buorrin.
– Sámi dáidda ja kultuvra lea dál áigeguovdil, muhto das leat geavatkeahtes vejolašvuođat. Sihkkarastin dihte ovdánanvejolašvuođaid ferte juoga dahkkot daiguin stuorra dárbbuiguin mat dán suorggis leat, earret eará buoret infrastruktuvra ja ollislaš doarjjaortnegat, dadjá Jåma.
Sámediggi hálddaša ollu ásahusaid ja doarjjaortnegiid sámi dáiddáriidda, ja sámi kulturlokten sáhttá čađahuvvot Sámedikki ekonomalaš rámmaid nannemiin. Sámediggeráđis leat čielga vuordámušat dasa ahte dáiddárdieđáhus ja vuoruheamit čuovvuluvvojit jođánit.
– Lea áigi ahte sámi kultursuorgi oažžu buoret rámmaeavttuid, ja mun illudan dáiddárdieđáhusa čuovvoleapmái ovttas kultur- ja dásseárvoministariin Trettebergstueniin, loahpaha Jåma.
Kapihttal 6 álgoálbmogiid ja unnitloguid birra mii sisttisdoallá earret eará čuovvovaš čuoggáid maid ráđđehus geatnegahttá vuoruhit čuovvoleamis:
- Ovttasbargat Sámedikkiin čielggadanbarggus das mo sámi dáidaga doarjjaortnegat buoremusat sáhttet dustet iešmearrideami ja ovttadássásašvuođa áigumušaid.
- Sihkkarastit sámi dáiddárkollektiivva Dáiddadálu doaimma.
- Váikkuhit dan bargui maid Sámediggi bargá buoridan dihte sámi museaid doaibmaeavttuid.
- Joatkit sihkkarastit ovdáneami prošeavttas mas áigot hukset ođđa visttiid RiddoDuottarMuseaide.
- Váikkuhit dan bargui maid Sámediggi dahká sihkkarastin dihte buriid rámmaeavttuid ja ovdánanvejolašvuođaid Beaivváš Sámi Našunálateáhterii Guovdageainnus.
- Doarjut barggu maid Arkiivadoaimmahat ja Sámi Arkiiva dahket vai luohtearkiiva šaddá olámuddui sámi álbmogii.
- Movttiidahttit ovddidit čoakkáldagaid ja oastit sámi dáidaga.
- Ovddidit ain relevánta álgoálbmotáššiid davviriikkalaš ovttasbarggus.
- Sihkkarastit Kvääniteatteri AS doaimma.
- Árvvoštallat Duohtavuođa- ja seanadankommišuvnna raportta kulturpolitihkalaš perspektiivvas ja čuovvulit daid doaibmabijuiguin.
Loga Meld. St. 22 (2022–2023) Kunstnerkår:
Gažaldagaid ja jearahallamiid oktavuođas bivdit váldit oktavuođa sámediggeráđiin Maja Kristine Jåmain (NSR), tlf. +47 472 42 366, maja.kristine.jama@samediggi.no