Runar Myrnes Balto
– Sámi doaktáriid searvi lea olu jagiid čájehan ahte searvi lea hui dehálaš aktevra ovttaárvosaš dearvvašvuođafálaldagaid sihkkarastimis sámi álbmogii. Danne mii leat ilus go sáhttit vuoruhit searvái addit lasi doaibmaruđa 2023:s. Doaivumis dat dahká ahte sidjiide lea álkibut vel eanet áiggi bidjat dan dehálaš bargui maid barget min buohkaid ovddas, dadjá sámediggeráđđi Runar Myrnes Balto (NSR).
Ovdamearka Sámi doaktáriid searvvi bargguin lea semináraid lágideapmi dehálaš fáttáid birra. Lassin njuolggodoarjaga lasiheapmái, lea sámediggeráđđi maiddái juolludan searvái 75 000 ruvdnosaš doarjaga lágidit seminára dearvvašvuođa birra sámi vuorasolbmuide Oslos. Fáddán leat earret eará vuoras sámiid vuoigatvuođat dearvvašvuođa- ja fuolahusbálvalusas oaivegávpogis.
– Sámi vuorasolbmot geat orrot stuora gávpogiin leat dahkkojuvvon oaidnemeahttumin, muhto sii leat guhká ohcalan dearvvašvuođa- ja fuolahusfálaldagaid mat leat heivehuvvon sámegillii ja sámi kultuvrii. Danne lea buorre go Sámi doaktáriid searvi dán semináras váldá ovdan ášši ja ságastallá Oslo sámi vuorasolbmuid birra. Dan bokte maiddái ožžot sámi vuorasolbmot, sin lagamuččat ja maiddái Oslo suohkan eanet dieđuid, dadjá Myrnes Balto.
Seminára galgá doaktáriid searvvi dieđuid mielde leat veahkkin oažžume albmosii hástalusaid, makkár resurssat leat olámuttus ja buoridanvejolašvuođaid sámi giella- ja kulturgelbbolašvuođa hárrái dearvvašvuođa- ja fuolahussuorggis sámi vuorasolbmuide Oslos. Seminára maiddái lea veahkkin hukseme oktavuođaid dearvvašvuođasuorggi fágaresurssaid ja sámi álbmoga gaskkas Oslos, ja lea dasto veahkkin gávdname konkrehta doaibmabijuid dearvvašvuođafálaldaga várás sámi vuorasolbmuide geat orrot Oslos.
– Sámediggi oaidná ahte lea dehálaš ovddidit hástalusaid mat gusket dasa ahte leat sámi vuorasolmmožin Oslo guovllus. Servodagas lea dárbu gávdnat buriid čovdosiid mat vuhtiiváldet sin vuoigatvuođa ja dárbbu oažžut dearvvašvuođa- ja fuolahusbálvalusaid main sámegiella ja kultuvra leat guovddážis. Sámi vuorasolbmot galget oažžut árvvolaš vuorasvuođa, dadjá Myrnes Balto.
Seminára oktavuođas maiddái lea ofelastin Dronning Ingrids hages, mii lea demeansagilli man Oslo suohkan lea ásaheame Osloi ja osiin dán buhcciidruovttus galgá maid sámevuohta čájehuvvot.
Seminára lágiduvvo Sámi viesus Oslos.
Jearahallama addá dahje gažaldagaid vástida sámediggeráđđi Runar Myrnes Balto (NSR), runar.myrnes.balto@samediggi.no