Maja Kristine Jåma Åse M. P. Pulk/Sametinget

Sámediggeráđi čilgehus sámi filmmaid birra govvida suorggi ja geahčada sámi filmmaid meroštallama ja árvogollosa. Dat maiddái válddaha sámi filbmasuorggi hástalusaid ja strategiijaid.

– Sámi filbmamáilmmis lea leamaš erenoamáš ovdáneapmi, muhto das leat muhtun ráje hástalusat dustet lassáneaddji buvttadandási, go leat máŋga stuorebuš buvttadeami čuovvovaš jagiid, dadjá sámediggeráđđi Maja Kristine Jåma (NSR).

Sámediggeráđi čilgehusas sámi filmmaid birra ovdanbuktojuvvojit iešguđegelágan čuolmmat ja vejolaš strategiijat dusten dihtii sámi filbmamáilmmi dárbbuid ja ovdánahttinpotensiála. Filmmat doibmet sámi álbmoga máinnasteami gaskaoapmin. Danin lea maiddái dehálaš sihkkarastit sámi iešmearrideami nu, ahte sihkkarastá ahte leat sámi mearrideaddjit geat mearridit guđe sámi buvttadeamit duohtandahkkojuvvojit.

Sámediggeráđi mihttun lea lasihit sámi filmmaid, ja ahte eanet filmmat leat gávdnamis iešguđege sámegielaide. Dán suorggis leat oalle stuorra golut, muhto mii maiddái sáhttá loktet sámi guovlluid árvoháhkama. Ferte liikká lasihit bušeahttarámmaid, vai sihkkarastá dan, ahte sámi guhkesfilbmabuvttadeamit ja dubbejuvvon filmmat lassánit.

– Mii háliidit earret eará nannet Internašunála Sámi Filbmainstituhta (ISFI) ja háliidit veahkkin nannet ISFI rájáidrasttideaddji kapasitehta dohkkeheami nu, ahte oainnusmahttit, ovdánahttit ja sihkkarastit oktasaš áŋgiruššama sihke nationálalaččat, davviriikkalaččat ja árktalaččat, oažžun dihtii buoret ruhtadeami, dadjá Jåma.

Sámedikki dievasčoahkkin gieđahallá čilgehusa bearjadaga, njukčamánu 10. beaivvi.

Gažaldagaid ja jearahallamiid oktavuođas bivdit váldit oktavuođa sámediggeráđiin Maja Kristine Jåmain (NSR), mob. +47 472 42 366, maja.kristine.jama@samediggi.no