Prošeakta lea doaibman geassemánu rájes, ja ulbmilin lea earret eará bidjat vuođu sámi borramušmearkka ásaheapmái. 

– Sámi borramušmearka lea dehálaš oassi prošeavttas sámi borramušárbevieruid oainnusmahttimis ja nannemis. Mearka doaibmá kvalitehtamearkan mii dáhkida ahte buktagat leat ráhkaduvvon sámi árbevieruid ja árvvuid mielde. Dát sáhttá leat mielde huksemen nana mearkagálvvuid mat buoridit fágalaš kvalitehta ja gávpejođu. Mearka veahkeha maiddái geavaheddjiid dovdat ja válljet sámi borramušbuktagiid, mii sáhttá lasihit jearu ja doarjaga báikkálaš buvttadeddjiide. Dasa lassin sáhtášii ovddidit ealáhusa ceavzilis ovdáneami ja profešonaliserema, seammás go dat gaskkusta sámi kultuvrra etihkalaččat ja kvalitatiivvalaččat buori vuogi mielde, lohká sámediggepresideanta Silje Karine Muotka. 

Dán vahkus leat muhtin fitnodagat, Sámediggi ja Visjona AS fitnan geahččamin ja oahppamin Plassjes. 

Lágideaddjin lei Rørosmat SA, mii lea oktasašorgána Rørostraktene biebmobuvttadeddjiid vuovdima, juohkima ja márkanfievrrideami várás, mii máŋggaid jagiid lea ráhkadan nana mearkagálvvu Rørosmat. 

– Min vuođđoávdnasat leat máilmmidásis, muhto mii sáhttit loktet iežamet bajás olles árvogollosis, ja mii fertet lagabut bargat ovtta, dadjá Ellinor Utsi, Davvi Siiddas. 

Mátkki manai earret eará Coop Mega buvdii geahččat mo stuorra ja smávva borramušbuvttadeaddjit profilerejuvvojit ja vuvdet gávppiin. Coop Mega Røros lea nagodan ollašuhttit, go lea addán buot buvttadeddjiide ildu sajiid, almmá gáibádusaid haga buvttadanvolumii, dat illudahttiid davviguovllu fitnodagaid. 

Joavku galledii maiddái Stensaas boazonjuovahaga, Rørosrein, Galåvolden Gård ja Røros Bryggeri. Min mielas lea dát rámis biebmoguovlu mas leat ámmátlaš aktevrrat. Fitnodagat ovttasbarget bures, sii movttiidahttet nubbi nuppi ja vuvdet nubbi nuppi buktagiid. 

– Mis leat máŋga smávva fitnodaga, muhto fitnodagat Plassjes leat maid leamaš smávvát oktii, muitala Alf Emil Paulsen Juga Mikrobryggeri fitnodagas.  

– Mii leat buohkat rikkis vásáhusaiguin, ja váldit oahppu mielde ruoktot bargat viidáseappot sámi borramušaiguin, lohká beaivválašjođiheaddji Harriet Steinkjer Nystu Visjona AS, guhte lea prošeaktajođiheaddji.