Gollegiella-bálkkašupmi lea geigejuvvon professor emeritus Nils Øivind Helanderii

Gollegiella-bálkkašupmi lea geigejuvvon professor emeritus Nils Øivind Helanderii, sámegillii Máre Jon Nilsa, su guhkes ja máŋggabealat eallinbarggu ovddas sámegiela ovddidemiin. 

Helander lea bargan iežas karrieara áigge sámegielaid sajádaga nannema ovddas, earret eará Romssa universiteahtas, Sámi allaskuvllas ja Sámedikkis Norgga bealde. Bálkkašupmeákkaid mielde lea Helander oahpaheaddjin, dutkin ja giellaáššedovdin váikkuhan mearkkašahtti láhkai davvisámegiela giellagáhttema ja sámegiela terminologiija ovddideapmái. Su bargu oidno maiddái máŋggaid sohkabuolvvaid sámegielaid ámmátolbmuid skuvlejumis ja gielladiđolašvuođas. Helandera áŋgiruššan ovddidit sámegielaid akademalaš geavaheami lea áibbas áidnalunddot.

Bálkkašumi vuoiti almmuhuvvui odne Helssegis go sámi áššiid ovddasvástideaddji ministarat ja Suoma, Ruoŧa ja Norgga sámediggepresideanttat deaivvadedje. Norgga bealde Sámedikki ovddastii sámediggeráđđi Paul Bendikk Jåma, ja Norgga ráđđehusa ovddastii gielda- ja guovloministtar Bjørnar Skjæran. 

Čoahkkimis digaštalle earret eará rievdadusaid sihkarvuođabirrasis sápmelaččaid geahččanguovllus ja duohtavuođa- ja seanadanproseassaid iešguđet riikkain.

Gollegiella-bálkkašumi leat ásahan sámeáššiin vástideaddji ministarat Norggas, Ruoŧas ja Suomas ovttas dáid riikkaid sámediggepresideanttaiguin. Bálkkašupmi juhkkojuvvui vuosttaš geardde 2004:s ja dat geigejuvvo juohke nuppi jagi. Bálkkašupmi geigejuvvo priváhta olbmui dahje organisašuvdnii gii/mii lea dahkan mávssolaš barggu ovddidit dahje seailluhit sámegiela.

Gollegiella-bálkkašumi vuoiti Nils Øivind Helander oktan bálkkašumi addiid ovddasteddjiiguin