IBBY-UNESCO Collection of Remarkable Books for Young Readers in Indigenous and Endangered Languages lea globála initiatiiva, mii ásahuvvui borgemánus 2026 lokten dihte mánáid- ja nuoraidgirjjálašvuođa álgoálbmot- ja áitojuvvon gielain.
Čieža sámi girjji 169 válljejuvvon girjji gaskkas
Sápmi ja sámi girječállit čalmmustuvvojedje bures ásaheami oktavuođas ja čieža sámi mánáidgirjji leat válljejuvvon čoakkáldahkii.
Čoakkáldagas leat 169 mánáid- ja nuoraidgirjji badjel 150 eamiálbmot- ja áitojuvvon gielas. Dat almmuhuvvui virggálaččat árabut borgemánus 40. IBBY máilmmikongreassas Ottawas, Kanadas, ON riikkaidgaskasaš álgoálbmotgiellalogijagi (2022-2032) oktavuođas.
Paul Bendikk Jåma
Árvu/Sámediggi
Sámediggeráđđi lea rámis go sámi girjjálašvuohta fuomášuvvo riikkaidgaskasaččat.
– Go dál leat válljen čieža sámi mánáidgirjji dán čoakkáldahkii, de dat čájeha sihke sámi gielaid kreatiiva givrodaga ja bohtosiid guhkes áiggi áŋgiruššamis sámi girjjálašvuođa ovddas. Sámi girječálliid ja illustrerejeddjiid riikkaidgaskasaš dohkkeheapmi lea mielde nannemin min gielaid, lasiheamen máhtu sámi kultuvrra birra ja sihkkarastimin ahte sámi muitalusat olahit ođđa lohkkiid miehtá máilmmi, dadjá sámediggeráđđi Paul Bendikk Jåma (NSR).
Riikkaidgaskasaš ánsu
Sámediggeráđi mielas lea hui buorre go sámi girjjálašvuohta olaha lohkkiid miehtá máilmmi.
– Sámi muitalusat addet mánáide ja nuoraide vejolašvuođa oahpásmuvvat álgoálbmogiid perspektiivvaide, máhttui ja kulturárbái. Danne lea deaŧalaš ahte sámi girjjálašvuohta oažžu lunddolaš saji dan globála ságastallamis giela, máŋggabealatvuođa ja álgoálbmotrivttiid birra, dadjá Jåma.
Dát čieža sámi mánáidgirjji leat válljejuvvon:
- Gos don leat, Elle?, Kirsi Máret Paltto
- Stiinná lea gárgidan, Anna Nutti Wiandt
- Gájuoh muv!, Sophia Rehnfjell, illustreren Inga-Wiktoria Påve
- Lilli, áddjá ja guovssahas, Elin Marakatt, illustreren Anita Midbjer
- Sájvvatjáhtje,Stig Riembbe Gælok, illustreren Ulrika Tapio Blind
- Nammalávlla, Beate Heide, davvisámegillii Thomas Hansen, illustreren Nina Marie Andersen
- O'lssee o'dinakai pei'vv, Maria Porsanger, illustreren Anna Illikainen