Konferánssa lágida Sámedikki nuoraidpolitihkalaš lávdegoddi (SáNuL) ovttas Suoma ja Ruoŧa beale Sámedikki nuoraidpolitihkalaš lávdegottiiguin. Konferánssa fáddá lea “sihkkarvuohta ja gearggusvuohta”, ja máŋga sámi organisašuvnna ja politihkalaš bellodaga leat bovdejuvvon searvat konferánsii ovddasteddjiiguin. 

– Mun illudan deaivvadit sámi nuoraiguin iešguđetge guovlluin ja organisašuvnnain. Lassin dasa ahte bargat sihkarvuođain ja gearggusvuođain, de áigut mii maid geavahit áiggi oahpásmuvvat nubbi nuppiin ja hukset oktavuođaid. Mu mielas dat lea dehálaš vai mii oažžut buori vuođu viidáset ovttasbargui, dadjá SáNuL jođiheaddji Therese Olsen.

Vuosttaš fysalaš nuoraidkonferánsa 2017 rájes

Nuoraidkonferánsa lágiduvvo parlamentarihkkárkonferánssa oktavuođas mii lágiduvvo seamma vahkkus Girkonjárggas. Dát lea vuosttaš geardde jagi 2017 rájes go lágiduvvo fysalaš nuoraidkonferánsa parlamentarihkkárkonferánssa oktavuođas. 2021:s dollojuvvui nuoraidkonferánsa digitálalaččat. 

– Lea hui somá ahte mii viimmat beassat čohkket sámi nuoraid dán láhkái fas. Nuoraid oainnut leat dehálaččat áššiide mat gusket min boahtteáigái, ja konferánsa addá áidnalunddot vejolašvuođa nannet ovttasbarggu sámi nuoraid gaska riikkarájáid rastá, dadjá Olsen. 

Konferánsa galgá addit oasseváldiide vejolašvuođa digaštallat áigeguovdilis hástalusaid mat gusket oadjebasvuhtii ja gearggusvuhtii Sámis, seammás go dat galgá leat veahkkin hukset fierpmádagaid ja nannet ovttasbarggu sámi nuoraidovddasteddjiid gaskkas Norggas, Ruoŧas ja Suomas.