Loga: Oahppoplána matematihkka 1.-10. ceahkki – sámegillii (PDF, 273 kB)
Læreplan i matematikk 1.-10.trinn - samisk plan (PDF, 174 kB)
Barggu duogáš
Beaiveálgu-sámediggeráđđi (2021-2025) álggahii barggu sierra sámi oahppoplánain matematihkas nannen dihtii sámi ohppiid vuoigatvuođaid ja sámi sisdoalu skuvllas. Sámediggi ovddidii sámi matematihka oahppoplána dárbbu juo 2018:s, muhto Máhttodepartemeanta ii oaidnán dárbbu dasa.
Sámediggi ásahii 2023:s matematihka fágajoavkku mii galggai árvvoštallat dárbbu sámi oahppoplánii matematihkas. Fágalaš joavkkus ledje professor Anne Fyhn, professor Per Ravna ja professor Anne Kajsa Partapuoli. Sii ráhkadedje raportta "Manne lea dárbu sámi parallealla ovttaárvosaš oahppoplánii matematihkas" (2024), mii gávnnahii ahte lei dárbu sierra sámi oahppoplánii.2023:s ásahuvvui fágajoavku mii gávnnahii ahte dákkár oahppoplána lea dárbbašlaš nannen dihte sámi identitehta, kultuvrra ja fágagiela. Vásáhusat álgoálbmogiin nugo Yupiaq Alaskas čájehit ahte kulturvuđot oahppoplánat sáhttet addit buoret oahppanbohtosiid.
Oahppoplána ovddideapmi
Ásahuvvui oahppoplánajoavku ja referánsajoavku mii galggai ráhkadit oahppoplánaevttohusa. Barggu vuođđun lei našuvnnalaš oahppoplána, muhto sisttisdoalai sámi perspektiivvaid nugo birgejupmi, sámi mihttoovttadagaid ja báikkálaš heiveheami. Sámi oahppoplánii lea lasihuvvon fágaidrasttideaddji fáddá guoddevaš ovddideapmi, mas birgejupmi lea guovddážis.
Gulaskuddanproseassa ja cealkámušat
Oahppoplánaevttohus lei gulaskuddamis geasset 2025, ja 12 gulaskuddanvástádusa váldojuvvojedje mielde. Cealkámušat ledje positiivvalaččat ja namuhit ahte oahppoplánas čielgasit boahtá ovdan mii lea deháleamos oahppi oahppamis, ahte lea doarvái sadji doaimmahit oahpu, ahte lea sadji aktiivvalaš ja váikkuheaddji oahppái, ja ahte árvovuođđu lea čielgasit reflekterejuvvon. Cealkámušat beare gáibideaddji ulbmiliid birra nuoramus ohppiide eai váldojuvvon vuhtii, muhto cealkámušat ahte duodji deattuhuvvo beare olu váldojuvvojedje vuhtii.
Boahtteáiggi dárbu
Máŋga gulaskuddanásahusa ohcaledje oahpponeavvuid ja doarjjamateriálaid. Dát gieđahallojuvvo Sámedikki oahpponeavvoráhkadeami strategiija bokte 2025-2028, ja lea olggobealde ieš oahppoplánabarggu.
Loga eanet: Diehtu sámi parallealla ovttaárvosaš oahppoplána matematihkas 1.-10.ceahkkái (PDF, 120 kB)
Loga raportta Manne lea dárbu sámegiel parallealla seammaárvosaš oahppoplánii matematihkas (2024). Raporta fágajoavkkus maid Sámediggi lea nammadan (PDF, 608 kB)