Sámi vuorasolbmot leat resursan servodahkii, ja dat boahtá ovdan strategiijas. Sámi vuorasolbmot guddet sámiid oktasaš historjjá ja máhtu, ja gaskkustit sámi árvvuid. Vuorasolbmot dihtet ja máhttet ollu giela, kultuvrra ja maiddái árbevirolaš máhtu ja ealáhusaid birra. 

— Vuorasolbmuid vásáhusat leat dehálaččat sámi servodahkii, ja dat fertejit leat ávkin boahttevaš buolvvaide. Ássanminsttar lea rievdan áiggi mielde, ja mii oaidnit ahte nuorat eai gulahala dál vuorasolbmuiguin seamma ollu go ovdal. Dat dagaha ahte ollu árbedieđut sáhttet jávkat. Sámediggeráđđi háliida dahkat buolvvaid gaskasaš searvevuođaid ja máhttofievrridemiid vejolažžan. Diliid ferte láhčit nu ahte dehálaš máhtu sáhttá lunddolaš vuogi mielde fievrridit, ja fertejit gávdnot arenat dan várás. Sámediggeráđđi háliida danne dán strategiija čuovvuleapmin ovddidit doaibmaplána Sámedikki vuorasolbmuidstrategiijii, dadjá sámediggeráđđi Berit Marie Eira (JSL). 

Sámediggi maiddái oaidná ahte sámegiella ja sámi kultuvra eai gozihuvvo guovddáš áŋgiruššamiin, eaige suohkaniid ja báikkálaš bálvalusain. Sámediggi ávžžuha ja hástala eiseválddiid ja earáid gozihit sámegiela ja sámi kultuvrra iešguđet oktavuođain, sáhttá leat dearvvašvuođa- ja fuolahusbálvalusain, dahje vuorasolbmuid kulturfálaldagain ja astoáigedoaimmain. 

Sámediggi háliida Sámedikki vuorasolbmuidstrategiijain váikkuhit ja bargat dan ovdii ahte sámi vuorasolbmot ožžot árvvolaš vuorasvuođa, ahte sii leat resursan servodahkii, boahtte buolvva sámiide ja boahtteáigái, ja ahte sii besset eallit iežaset eallimiid ovttaárvosaš sápmelažžan ja ovttaárvosaš olmmožin. 
Ollu sámi vuorasolbmot háliidit searvat ja leat mielde sosiála searvevuođas doppe gos orrot, maiddái dalle go leat pensionisttat. Vuorasolbmuin galgá leat váikkuhanvejolašvuohta dain servodagain gos orrot, danne go sin veahkki lea dehálaš servodahkii ja báikegoddái, ja addá vuorasolbmuide gullevašvuođa, ulbmillašvuođa ja ja buoret eallinkvalitehta.

— Sámedikki vuorasolbmuidráđđi maiddái lea resursa mii lea hui ávkkálaš sámediggeráđđái min barggus. Vuorasolbmuidráđis maid lea leamaš guovddáš rolla strategiija hábmemis, ja lea gulahallan eará sámi vuorasolbmuiguin riikkas, ja dainna lágiin lea ožžon vuorasolbmuid jiena mielde strategiijai, dadjá sámediggeráđđi Eira.

Sámediggeráđđi maiddái dárbbaša Sámi vuorasolbmuidráđi veahki go galgá čuovvolit strategiija. 
 
— Servodat lea rievdan ja dat váikkuha maiddái vuorasolbmuid eallimii. Dál leat ollu vuorasolbmot dearvašeappot ja lášmadeappot go ovdal, ja olbmot ellet guhkit go ovdal. Teknologiija lea šaddan buoret ja dahkan stuora rievdadusaid main leat sihke buorit ja heajos váikkuhusat vuorasolbmuide, ja main sámegiella ii álo leat doarvái vuhtiiváldojuvvon. Dan áigu Sámediggi ain deattuhit sihke guovddáš eiseválddiide ja suohkaniidda, vai maiddái sámi geavaheaddjit sáhttet atnit buresbirgenteknologiija, loahpaha sámediggeráđđi Berit Marie Eira (JSL).