Sámiráđđi áigu prošeavttas Sápmái buorrin – En bærekraftig fremtid for samiske bedrifter geahččalit ođđa vugiid movt sámi ealáhushutkit ja fitnodagat sáhttet olahit márkanii. Áigumuš lea golmma gávpogis lágidit pilohtaprošeavttaid main sámi buktagat biddjojuvvojit arenaide mat leat oidnosis ja gávppálaš oktavuođain dehálaččat, nugo hoteallaide, rámbuvrraide ja johtolatguovddážiidda.
– Dát prošeakta vástida ollu dehálaš dárbbuide mat sámi ealáhusain leat. Dás lea sáhka sihke das ahte leat oidnosis, márkanii olaheamis ja min sámi gálvomearkkaid nannemis. Sámediggi lea ilus go sáhttá doarjut prošeavtta mii veahkeha buoridit sámi buvttadeddjiid eavttuid ja reaidduid vai lihkostuvvet, dadjá sámediggepresideanta Silje Karine Muotka.
Autenttalaš sámi buktagat, nuorra searat ja gávppašeapmi riikkarájiid rastá deattuhuvvojit
Dehálaš ulbmil lea ahte olbmuide šaddá álkibun gávdnat ja oastit albma sámi buktagiid – ja seammás fállat molssaeavttu dakkár gálvvuid sadjái mat galggašedje sulastahttit sámi buktagiid ja mat leat látnalassii buvttaduvvon, eai ge leat ávkin sámi servodahkii.
Prošeavttas earret eará ráhkadit digitála fitnodatkataloga mas lea interaktiiva kárta mii čájeha sámi fitnodagaid, ođasmahttojuvvon neahttasiiddu sámi gálvomearkkaide ja láidehusa vejolašvuođaid birra duoji ja designa vuovdimis olgoriikii. Dasa lassin fállet kurssaid, rávvenortnegiid ja ruovtturesideansaprográmma nuorra sámi ealáhushutkiide.
– Mii diehtit ahte ollu sámi ealáhushutkit leat akto dalle go álggahit doaimma. Danne lea dehálaš hukset fágalaš fierpmádaga ja juogadit dieđuid buolvvaid gaskkas. Olles sámi ealáhusdoaibma nannejuvvo go nuorat ožžot doarjaga duohtandahkat iežaset jurdagiid iežaset eavttuid vuođul, dadjá Muotka.
Sámi fitnodagain dávjá leat hástalusat vuovdaleami ja gávppašeami dáfus riikkarájiid rastá. Danne prošeakta áigu smávva ja gaskasturrosaš fitnodagaide fállat buoret reaidduid maiguin olahit viidát – sihke Sámis ja olggobeale Sámi. Digitála fitnodatkataloga ja ođasmahttojuvvon neahttasiidu galgá dahkat ahte lea álkit gávdnat sámi buktagiid, ja buoridit gávppašanvejolašvuođaid riikkaidgaskasaččat.
– Sápmelaččat leat okta álbmot riikkarájiid rastá. Danne maiddái ferte vuovdinmárkaniid heivehit Sámi duohtavuhtii, loahpaha Muotka.
800 000 ruvdnosaš doarjja juolluduvvo guovtti doarjjaortnegis: 500 000 ruvdno juolluduvvo Interreg doarjjaortnegis ja 300 000 ruvdno Sámedikki ortnegis Regionála ovdánahttin.