Majestehta gonagas, Ruoŧa Sámedikki ságadoalli ja stivraságadoalli, Inatsisartut ovdaolmmoš, Ruoŧa parlameantta, ráđđehusa ja girku ovddasteaddjit, Sámedikki áirasat, guossit. Buorit olbmot.

Go mánnu riegáda de álgá ođđa áigodat. Dál lea šaddi mánnu, ja dán áiggis leat dološ olbmot ávnnastan ja njuovvan. Juohke diŋga lea dego ealáskeamen ođđa mánus.

De heive maid hui bures ahte Sámedikki ođđa mandáhtaáigodat álggahuvvo šaddi mánus, go galgabehtet ávnnastit ja duddjogoahtit dan politihkka mii galgá láidestit din boahtte njealje jagi.

Duohtavuođakommišuvnna raportta čuovvuleapmi šaddá hástaleaddji ja dehálaš áššin. Stáhtaid assimilerenpolitihkka lea garrasit váikkuhan min álbmogii. Eat dieđe vel maid raporta čájeha, muhto mii diehtit ahte máŋgasat leat massán iežaset giela ja gullevašvuođa. Lea áibbas mearrideaddji ahte sámi servvodat oažžu doarvái návccaid vai čuovvulit dán stuorra divodanbarggu. Mii sápmelaččat eat nákce dan okto – olles servvodat ferte leat mielde.

Norgga bealde lea jienastuslohkku garrasit lassánan, ja leat oaidnán ahte Duohtavuođa- ja seanadankommišuvnna raporta lea váikkuhan dasa ahte eanet olbmot leat čálihan iežaset. Lea illudahtti ahte nu máŋgasat háliidit searvat ja ahte min sámi demokratiija stuorru.

Mats Jonssona girji ”Go leimmet sápmelaččat” lea muitalus su soga birra, ja seammás dat lea muitalus Sámi historjjás Ruoŧas. Rávisolmmožin son gávnnaha ahte lea sápmelaš. Girjjis son govahallá go čálihii iežas jienastuslohkui. Čállá ahte dál servvodat boahtá oaidnit su sápmelažžan. Muhto leago jienastuslohku mii mearrida leatgo sápmelaš.

Ja de jearrá makkár máhttu sus lea. Muhto ii oktage leat riegádan ákšu gieđas. Mii oahppat guovtti soabbái. Ja Sámis mii dárbbašat buohkaid - ja buohkaide galgá sadji min goađis. Vaikko makkárin don leat, ja vaikko main don máhtát - dahje it máhte.

Mun liikon bures go Jonsson čállá: ”ale jeara maid Sápmi sáhttá du ovddas dahkat, jeara baicce maid don sáhtát dahkat Sámi ovddas”. Ja mu mielas heive bures siteret dán justa odne, go dii geat lehpet válljejuvvon Sámediggái, dii lehpet dáhkan justa dan, ja fállan iežadet návccaid ja áŋgiruššama sámi álbmogii.

Ollu lihkku buot áirasiidda!

Sávan didjiide sáhkkiivuođa

Sávan didjiide roahkkatvuođa

Sávan didjiide gierdevašvuođa

Ja sávan ain buori ovttasbarggu min gaskka sámi álbmogii buorrin.