Mikkel Eskil Mikkelsen Vaino Rensberg/Sametinget

– Mun sávan lihku Rossen tjïeltii ja bures boahtima ossodahkii, ja bovden mánáidgárddi mielde nuvttá sámegielat mánáidgárdeortnegii, dadjá sámediggeráđđi Mikkel Eskil Mikkelsen (NSR).

Praahka ossodat nanne fálaldaga

Lullisámi giellaguovllus gávdnojit ovdalaččas 3 sámi mánáidgárdefálaldaga. Dál šaddet 4 go Praahka mánáidgárddis leat ožžon sámi ossodaga. Rossen tjïelte lea rievdadan láhkaásahusaid. Mikkelsen dadjá ahte lea dehálaš oažžut eanet mánáidgárdefálaldagaid.

– Sámedikkis lea čielga mihttu oažžut eanet mánáidgárdefálaldagaid, danne lea suohkanstivrra mearrádus illudahtti ja dehálaš. Mun sávan lihku Rossen tjïeltii danne go dát mielddisbuktá eanet sámegielagiid boahtteáiggis ja lea mielde sihkkarastime ahte sámi mánáid vuoigatvuođat bajásšaddat sámi giela, kultuvrra ja servodateallima vuođul ollašuvvet, dadjá Mikkelsen.

Bovde nuvttá sámegielat mánáidgárdeortnegii

Njuolggadusrievdadusain oažžu ossodat vejolašvuođa searvat Sámedikki nuvttá sámegielat mánáidgárdeortnegii. Ortnet galgá dahkat ahte mánáidgárdi šaddá ollásit sámegielagin, seammás go váhnenmáksu gokčojuvvo. Dat dahkkojuvvo refušuvdnaortnega bokte ja ovttasbargošiehtadusa bokte mánáidgárdeeaiggádiiguin.

Mikkelsen sávvá mánáidgárdái bures boahtima dán ortnegii ja ávžžuha seammás mánáidgárddi maiddái ohcat doarjaga sierra sámi ossodahkan:

– Mii leat álggahan nuvttá sámegielat mánáidgárdeortnega masa Praahka ossodat maiddái sáhttá dál searvat. Mun sávan ahte ossodat searvá ortnegii, ja sávan ahte lihkostuvvat oažžut ovttasbargošiehtadusa mas geahčadit mii ferte dahkkojuvvot sihkkarastin dihtii ahte ossodat lea ollásit sámegielat, loahpaha Mikkelsen