Prošeaktajođiheaddjis galggašii ovddemusas leat kántursadji juoppá čuovvovaš Sámedikki kánturbáikkiin; Skánik dahje Romsa. Sámedikki eará kánturbáikkiid sáhttá árvvoštallat, jus leat guoros kántursajit. Sámedikkis lea maiddái sierra ruovttukánturortnet.  

Prošeavtta birra

Davvi kulturárbi – davvi kulturárbbi oktasaš áŋgiruššan – lea vihttajagi prošeakta (2026-2030) mii galgá nannet Davvi-Norgga kulturárbbi suodjaleami ja geavaheami rávvema, gelbbolašvuođaloktema ja digitála bálddalastima bokte, ja dan bokte ahte ásahit ávnnasbáŋkku visteosiid ođđasit atnima várás. Dat lea ovttasbargoprošeakta gaskal Sámedikki, Romssa fylkkasuohkana, Lulli-Romssa musea ja Várdobáikki sámi guovddáža. Prošeakta lea ollásit ruhtaduvvon ja dan doarju Arktis 2030. Prošeakta galgá fállat kulturbirrasiid eaiggádiidda rávvagiid ja čuovvoleami, nannet báikkálaš gelbbolašvuođa ja árbevirolaš duoji ja hábmet fierpmádaga árbevirolaš duojáriid, kulturbirrasiid eaiggádiid ja hálddašeami gaskkas.   

Buot ovttasbargoguoimmit háliidit dáinna prošeavttain várjalit dan dieđu mot olbmot leat huksen ja eallán davvin. Dat ii dušše buvtte máhtu vássánáiggi birra, muhto maiddái buriid čovdosiid boahtteáigái.

Prošeaktajođiheaddjin šaddá du bargun nannet ja ovdánahttit ollislaš ja ceavzilis áŋgiruššama kulturhistorjjálaš visttiid ja birrasiid suodjaleami ja atnima várás Davvi-Norggas. Dan olaha rávvema, gelbbolašvuođaloktema, fierpmádathuksema ja digitála ovdánahttima bokte, ovttasbargguin museaiguin, duojáriiguin, eaiggádiiguin ja eará aktevrraiguin. 

Sámedikki bargit fertejit rehkenastit veahá mátkkoštit.

Barggut

Prošeaktajođiheaddjin dus leat čuovvovaš barggut:  

• Nannet ja ovdánahttit ollislaš ja ceavzilis áŋgiruššama kulturhistorjjálaš visttiid ja birrasiid suodjaleami ja atnima várás Davvi-Norggas, rávvema, gelbbolašvuođaloktema, fierpmádathuksema, digitála ovdánahttima ja ávdnasiid ođđasit atnima bokte, lagas ovttasbargguin museaiguin, duojáriiguin, eaiggádiiguin ja eará aktevrraiguin.  
• Jođihit ja viiddidit ovttasbarggu.
• Ásahit ovttasbargošiehtadusaid ja geatnegasvuođaid ovttasbargiiguin viidásit doaimma várás.
• Duođaštit vásáhusaid ja ráhkadit ávžžuhusaid viidásit bargui, mii hábme vuođu bistevaš ruhtadeapmái.
• Kulturbirrasiid eaiggádiid, geavaheddjiid ja hálddašeddjiid rávvet ja loktet sin gelbbolašvuođa
• Nannet duodjegelbbolašvuođa ja fierpmádathuksema
• Ráhkadit doaibmabijuid nuorra duojáriid rekruterema várás vistegáhttenbargui.
• Ásahit ávnnasbáŋkku visteosiid ođđasit atnima várás.
• Ráhkadit ovttasbargomodeallaid ealáhusaktevrraiguin ja earáiguin
• Jođihit ja ovdánahttit neahttasiiddu Kulturarvnord.no
• Ekonomiijastivren ja raporteren prošeaktaáigodagas

Du bargobeaivi hábmejuvvo dárbbuid mielde ja du gelbbolašvuođa mielde. Fertet rehkenastit ahte virggi ja juhkosa barggut ja ovddasvástádussuorggit rivdet ásahusa dárbbuid mielde.

Loga eanet virggi birra ja oza virggi Karrieresiiddus