Seksa miehtama haga lea veagalváldin. Kampánja lea vuosttažettiin meinejuvvon nuorra dievdduide gaskal 16 ja 30 jagi. Snapchat, TikTok ja eará kampánjamateriálaid bokte galgá kampánja fuomášuhttit, hástalit miellaguottuid ja oažžut olbmuid jurddašit ja ságastallat rupmaša, seksa, rájáid ja miehtama birra.

www.sexyordbok.no leat evttohusat sámegiel sániide ja dadjanvugiide mii sáhttá dahkat álkibun hupmat rupmaša, seksualitehta, miehtama ja rájáid birra. Sánit leat ráhkaduvvon ovttas iešguđetge sámegielagiiguin. Sánit eai leat normerejuvvon, muhto galget leat vuođđun ságastallamii, ovdáneapmái ja viidáset giellabargui.

Sámi servodagas lea leamaš tabu hállat dán birra, ja mis váilot buorit sánit iežamet gielain. Mii leat ožžon ollu árvalusaid dan birra ahte lea dárbu loktet fáttá, sihke geavahit sámi sániid rupmaha ja seksualitehta birra ja leat čielgasat das ahte miehtan lea dárbbašlaš jus galgá leat seksa. Mii sávvat ahte dát kampánja sáhttá leat mielde botkeme dáid tabuáššiid, dadjá sámediggeráđđi Ann-Elise Finbog.

Gielas lea fápmu. Dat hábme mainna lágiin mii ipmirdit iežamet rupmaša, seksualitehta ja rájáid, ja váikkuhuvvo das man birra mii hupmat ja man birra mii eat huma.

Mii hállat olu rájáid ja miehtama birra. Seamma dehálaš lea hállat dan birra maid ráját ja miehtan mearkkašit, ja movt geavadis mearridit rájáid. Go mii álgit ságastit dán birra, de sáhttá dat leat eastadeaddjin, dadjá spesialkonsuleanta Liv Eli Gaup

Kampánjja ulbmil lea unnidit heahpada, nannet nuoraid eaiggátvuođa iežaset rupmašii ja seksualitehtii, ja čilget gokko ráját mannet. Kampánja galgá leat hearvás ja čielga vuostebealli pornoi, deddui ja «guttastemingai». Dannego miehtan ii billis miela, muhto dahká oadjebas ja buori seksa vejolažžan.

Streaming av lanseringa kan du se her: