Sii ožžot Sámediggi kultur- ja valáštallanstipeanda

Sámediggeráđđi lea juohkán stipeandda njealljásii nuorra sámi kultur- ja valáštalliin, geat ožžot 25 000 ruvnno guhtege.

– Mii leat ilus go sáhttit doarjut njeallje earenoamáš nuorra sápmelačča Sámedikki kultur- ja valáštallanstipeanddain 2025:s. Dát stipeanddat leat mielde ovdánahttime sin kultur- ja valáštallandoaimmaid, ja mii illudit čuovvut sin viidáseappot, dadjá sámediggeráđđi Paul Bendik Jåma.

Stipeandda ulbmilin lea movttiidahttit sámi nuoraid áŋgiruššat dáidagiid, kultuvrra ja valáštallama siskkobealde.

– Lea álo illu doarjut sámi taleanttaid. Ollu lihkku buohkaide geat leat ožžon kultur- ja valáštallanstipeandda. Mii sávvat ahte stipeanda addá didjiide vejolašvuođa ollašuhttit din nieguid, dadjá sámediggeráđđi Jåma.

Dán jagi oažžuba Ole Herman Hætta ja Emelita Gaup Mathisen valáštallanstipeandda, ja Johannes Vang ja Grethe Julianne Haraldsdatter Skum oažžuba kulturstipeandda.

Oktiibuot bohte 17 ohcama mat devde stipeandaortnega eavttuid, dain ledje 11 valáštallanstipeandda ohcama ja 6 kulturstipeanda ohcama.

Dán jagáš stipeandaoažžut:

Valáštallanstipeanda:

Ole Herman Hætta lea 18 jagi boaris, ja lea olahan buriid bohtosiid sihkkelvaláštallamis. Son lea hui buorre meahccesykkelasti, ja lea Finnmárkku buoremus sykkelasti. Ole Herman lea guhkás joavdan iežas suorggis, ja soaitá leat Davvi-Norgga buoremus sykkelasti. Maŋemus áigodaga lea son olahan buriid bohtosiid Norgga cupas ja lea olahan 8. saji NM:s. Maŋimuš jagi lea son beaggán mediain bohtosiiddis geažil. Dat lea iešalddis movttiideaddjin nuorra sihkkelasttii. Son háliida leat buorre ovdagovva, ja háliida čájehit ahte sámi nuorat sáhttet lihkostuvvat sihke kultuvrras ja valáštallamis.

Emelita Gaup Mathisen lea 16 jagi boaris ja lea aktiiva mohtorcrossas. Son vázzá Leavnnja joatkkaskuvlla, ja vuodjá Leavnnja Mohtorklubbas. Son bođii nubbin nissonluohkás Kara MX gilvvus Kárášjogas 2024:s. Leat unnán nieiddat ja nissonat geat servet mohtorcrossii. Go joatká valáštallamiin, de háliida son čájehit ahte nieiddain ja nissoniin lea vejolaš lihkostuvvat dán valáštallamis.

Kulturstipeanda:

Johannes Vang lea 24 jahkásaš filbmadahkki, gii lea eret Ráissas. Son lea ráhkadan ollu oanehisfilmmaid ja dokumentárafilmmaid, sihke dárogillii ja sámegillii. Su mielas lea historjjáid muitalit buoremus ealli govaiguin, ja das lea ollu maid sáhttá bargat. Filmmaid bokte lea son gávdnan iežas doaimma ja identitehta, ja geavaha filbmema ovddidit iežas identitehta, ja seammás oahppá giela.

Grethe Julianne Haraldsdatter Skum lea 24 jagi boaris ja bargá dáidagiin. Son lea fárren Álttás vai sáhttá čuovvut niehku šaddat dáiddárin. Son háliida áŋgiruššat dáidagiin. Oahpu bokte háliida ovdánahttit iežas dáiddalaš giela, vuosttažettiin govvadáidagis, ja guorahallat eará dáiddasurggiid. Su mielas lea dáidda sihke persovnnalaš ovdanbuktin ja vuohki čalmmustahttit historjjáid, perspektiivvaid ja identitehta.

Ovddeš vuoitit:

2024

Valáštallanstipeanda: Karin Alida Boine, Elisa Götch ja Daniel Ailo Sakshaug Bær

Kulturstipeanda: Linus Johnsen

2023

Valáštallanstipeanda: Sandra Maria Balto ja Tobias Hætta

Kulturstipeanda: Elise Marie Nilsen-Broderstad ja Elina Johanen Ijäs

2022

Valáštallanstipeanda: Ine Mariell Trane Porsanger ja Jonna Johanne Dunfjeld-Mølnvik

Kulturstipeanda: Leander A. Gilsåmo ja Iris Storelv-Rabone

2021

Valáštallanstipeanda: Stine Lise Nordsletta ja Anders Inga

Kulturstipeanda: Jon Mika Nystad Eskonsipo ja Máret Julianne Gaup

2020

Valáštallanstipeanda: Amalie Storelv ja Oliva Braastad

Kulturstipeanda: Peder Niilas Tårnesvik, Emil Nikolaus Karlsen ja Lávre Johan Eira

2019

Valáštallanstipeanda: Amalie Kristine Triumf, Peder Funderud Skogvang ja Tuva Sirin Schall Mikkelsen

Kulturstipeanda: Ánna-Katri Helander

Almmuhuvvon 10.12.2025 11.39

Maŋemusat rievdaduvvon 10.12.2025 11.39