– Go šattai oktasaš Duohtavuođa- ja seanadankommišuvdna láhčá buriid vejolašvuođaid čuovvulanbarggus. Sámiin ja kvenain lea dáruiduhttima bokte vuorbeoktavuohta. Dál leat mii ovttaoaivilis ahte dás ovddasguvlui galget leat bissovaš, jahkásaš čoahkkimat gaskkal Sámedikki ja Norske kveners forbund – Ruijan kvääniliitto, main mihttu lea nannet ja čavdudit gaskavuođaid mat goariduvvojedje guhkes dáruiduhttinproseassas, dadjá sámediggeráđđi Runar Myrnes Balto.

Otná čoahkkimis váldojuvvojedje ovdan buorit ovdamearkkat mo bargat ovttas Sámi álbmotbeaivvi ja kvena álbmotbeaivvi oktavuođas Porsáŋggus. Lea dárbu bargat miellaguottuiguin, ja nuorat ja sin veahkki lea vealtameahttun. Mii leat ovttaoaivilis bargat ovttas ja ovddasguvlui doarjut guhtet guimmiineamet.

– Leat ilus go leat boahtán johtui dáinna dehálaš bargguin. Kvenain ja sápmelaččain leat ollu oktasašvuođat, ja dál lea áigi láddan eanet ovttas bargat. Mii illudat álggahit ođđa, oktasaš deaivvadanbáikkiid, dadjá Nkf-RK jođiheaddji Kristin Mellem.