Duoji ealáhusšiehtadus lea Sámedikki deháleamos gaskaoapmi duodjeealáhusa ovdáneapmái. Sámediggi viiddida dál muhtin doarjjaortnegiid, háhkan dihte eanet duojáriid ealáhussii. Doarjja oktasaš duodjebájiide viidásetfievrreduvvo, ja ođas boahtte guovtti jahkái lea ahte galgá maid addot álggahanstipeanda ođđa duodjedoaimmaid ásaheapmái.

Seammás viiddiduvvo čálgoortnet nu ahte dat guoská maid oahpahalliide duodjefitnodagain, mas Sámediggi gokčá buohccindieđihemiid 1. beaivvi rájes 16. beaivvi rádjái.

– Sámediggi oaivvilda ahte dát lea buorre duodjefitnodagaide, mat de eai dárbbaš máksit bálkká dán áigodagas, dadjá sámediggeráđđi Runar Myrnes Balto (NSR).

Son dadjá ahte Sámediggi háliida váldit stuorát ovddasvástádusa duodjeealáhusa ovddideamis, ja lea ealáhusšiehtadusas várren ruđa vai sáhttet doarjut duojáriid fitnodat- ja gávpeovdánahttima.

Stuorát gálvojohtu duojis stuorát márkaniidda lea guovddážis Sámedikki vuoruheamis, ja Sámediggi lea lasihan ruđa márkanheiveheapmái.

– Dán ortnega siskkobealde sáhttá maid ohcat doarjaga vuovdinbeavde- ja márkanastindoallogoluide, ja Sámediggi lea gullan ahte Bådåddjo 2024 searvan sáhttá leat áigeguovdil. Dáinna doarjjaortnegiin sávvá Sámediggi sáhttit dagahit stuorát searvama vuovdinbáikkiide, márkanastindoaluide ja eará márkanastindoaimmain, dadjá Myrnes Balto.

Son ávžžuha duodjefitnodagaid ja duodjeorganisašuvnnain ohcat Sámedikki doarjjaortnegiin doarjaga, seammás go bivdá servviid ja earáid addit dieđu Sámediggái jus háliida eanet oahpásnuvvat duoji doarjjaortnegiiguin.

– Sámediggi searvá áinnas jahkečoahkkimiidda ja eará lágidemiide muitalit vejolašvuođaid birra Sámedikki doarjjaortnegiid siskkobealde duoji ovddideapmái, dadjá sámediggeráđđi.

Šiehtadallanbealis duoji ealáhusšiehtadusas leat Sámediggi ja duodjeorganisašuvnnat Sámiid Duodji ja Duojáriid Ealáhussearvi (DES). Duojáriid Ealáhussearvi ii leat mielde dán šiehtadusas.

– Mii fertet dušše dohkkehit ahte DES ii háliit leat mielde dán šiehtadusas. Seammás lean hui oadjebas das ahte dát šaddá buorren šiehtadussan maiddái duodjái ealáhussan, ja jáhkkit ahte DES miellahtuide maid boahtá dat buorrin, dadjá Myrnes Balto.

Jearahallama addá dahje vástida gažaldagaide sámediggeráđđi Runar Myrnes Balto (NSR), +47 977 73 778, runar.myrnes.balto@samediggi.no