Bealit bohte ovttaoaivilii juo vuosttas šiehtadallančoahkkimis, mii dollojuvvui gaskavahkku geassemánu 4. beaivve.
– Mii leat ilus go leat soahpan. Sámedikki mihttomearri lea ovddidit duoji ealáhussan, nu ahte dat addá lassi gánnáhahttivuođa ja movttiidahttá vuovdit iešbuvttaduvvon gálvvuid. Šiehtadus váikkuha buoret rámmaeavttuid ovttaskas buvttadeddjiide. Duodjeealáhus ovdána positiivvalaččat, ja min mihttomearri lea ahte duodji oažžu ain stuorát árvvu servodagas. Háliidan giitit organisašuvnnaid dan dehálaš barggu ovddas maid barget ealáhusa ovddas, lohká sámediggeráđđelahttu Elisabeth Erke (Gb).
Šiehtadusa vuođđun lea guhkesáiggi ovttasbargu beliid gaskka, ja mearkkaša ahte investeremiid, ovddidandoaibmabijuid, duodjestipeanddaid ja gelbbolašvuođaloktema rámmat nannejuvvojit.
Elisabeth Erke, Magne Svineng, Catarina Utsi, Hanne Marion Gaup, Marit Guttorm Graven & Ole Mathis Sara Nedrejord
Sámediggi / Sametinget
Organisašuvnnat Sámiid Duodji ja Duojáriid Ealáhussearvi leat guovddážis duoji ovddideamis. Oassin šiehtadusas juolluduvvo Sámiid Duodjái 1 430 000 ruvnno, ja Duojáriid Ealáhussearvái fas 690 000 ruvnno.
– Mii leat duhtavaččat go šattaimet ovttaoaivilii. Mii eat leat duhtavaččat buot áššiin, muhto mii beasaimet ovttaoaivilii ja dat lea buoremus, lohká Duojáriid Ealáhussearvvi šiehtadallanlávdegotti jođiheaddji, Marit Guttorm Graven.
Maiddái Catarina Utsi, Sámiid Duoji šiehtadallanlávdegotti jođiheaddji, lea duhtavaš bohtosiin:
– Lei buorre čoahkkin ja beasaimet hupmat movt mii ovttas loktet duoji ealáhussan. Nubbi lea dat prošeakta maid Sápmi Næringshage lea álggahan dán jagi, dadjá Catarina Utsi Sámiid Duojis.
Sápmi Næringshage ovttas Sámedikkiin fállet prográmma mii galgá doarjut duojáriid geat háliidit álggahit dahje ovdánahttit iežaset doaimma. Prográmma loahpahuvvo 2026:s.
Bealit leat maid ovttaoaivilis guorahallat vejolašvuođaid nannet oahppofálaldaga duojis, earret eará ásahit fágaskuvlla. Šiehtadus lea dahkkon organisašuvnnaid gáibádusaid ja Sámedikki fálaldagaid vuođul.
Gaskavahku geassemánu 4. beaivvi bohte bealit ovttaoaivilii.
Oktavuođadieđut:
Sámediggeráđđi Elisabeth Erke tlf. 411 64 145
Duojáriid Ealáhussearvi: Marit Guttorm Graven tlf. 477 14 182
Sámiid Duodji: Catarina Utsi tlf .958 85 739