Stuoradikki Duohtavuođa- ja soabahankommišuvnna raportta gieđahallan addá doaivaga kveanagillii. Dál bivdá Norgga kvenaid lihttu Gielda- ja guovlodepartemeantta ovttastahttit áŋgiruššamiid. Sii háliidit ahte departemeanta bidjá johtui barggu ahte buot aktevrrat mat barget kveanagielain galget ovttasráđiid bargat, vai resurssat geavahuvvojit nu bures go vejolaš.

Sámediggeráđđi lea sádden doarjjareivve Gielda- ja guovlodepartementii, mas sii deattuhit ahte lea deaŧalaš ovttastahttit áŋgiruššama ja dárbbašlaš doaibmabijuid nannen dihtii kvena giela.

– Dáruiduhttin lea čuohcan sihke midjiide sámiide, kvenaide/norggasuopmelaččaide ja vuovdesuopmelaččaide. Vaikko dáruiduhttin lea váikkuhan midjiide iešguđetge láhkai, de mis leat oktasaš vásáhusat ja mis leat dál seamma hástalus: Min gielat ja min kultuvra lea gillán stuora vahágiid, dadjá sámediggeráđđi Runar Myrnes Balto ja joatká:

– Stáhta ferte bidjat johtui doaimmaid dál sihkkarastin dihtii kvena gillii boahtteáiggi. Dárbbašuvvo sihke ovttastahttin ja konkrehta doaibmabijut njulget dáruiduhttinpolitihka vearrivuođa.

Lihttu evttoha maiddái hoahppodoaibmabijuid nu go eanet oahpposajiid kveanagillii, nannet Kveana instituhta ja giellaguovddážiid, ja ásahit eanet giella- ja kulturguovddážiid.

– Kvenat fertejit ieža defineret maid soabaheapmi mearkkaša sidjiide ja movt dan galgá olahit. Mii doarjut evttohuvvon doaibmabijuid ja oaivvildit ahte dat sáhttet leat mielde njulgemin muhtun ráje das maid sii leat massán dáruiduhttinpolitihka dihte, dadjá Myrnes Balto.