Sámediggeráđđi lea árvalusastis bajitdási áššái Duohtavuođa- ja soabadankommišuvnna birra, evttohan čielgasit čalmmustahttit solidaritehta kvenaiguin/norggasuopmelaččaiguin ja vuovdesuopmelaččaiguin.

Dan oktavuođas leat kvena ja vuovdesuopmelaččaid organisašuvnnat bovdejuvvon dievasčoahkkimii. Maŋŋá go bajitdási ášši lea meannuduvvon, de lágiduvvo verdde-boddu sámediggepresideanttain ja Norske kveners forbunda ja Skogfinneforeninga ovddasteddjiiguin, čájehan dihte goabbatbeallásaš solidaritehta. 

Verddedilálašvuođas geigejuvvojit skeaŋkkat ovddasteddjiid gaskka. Verddedilálašvuohta lágiduvvo njukčamánu 6. beaivvi dii 13:00 lávus olggobealde Sámedikki. 

Sámediggeráđi árvalus solidaritehtacealkámuššii čuodjá ná:

Doarjja kvenaide/norggasuopmelaččaide ja vuovdesuopmelaččaide.

Raporta muitala dáruiduhttinpolitihka ja vearrivuođa birra mii lea dahkkojuvvon sápmelaččaid, kvenaid/norggasuopmelaččaid ja vuovdesuopmelaččaid vuostá. Sámiid álbmotválljen orgánan Sámediggi háliida dovddahit nanu ja čielga doarjaga kvenaid/norggasuopmelaččaid ja vuovdesuopmelaččaid vuoigatvuhtii oažžut njulgejuvvot vahágiid, ja sin vuoigatvuhtii sierra soabadanproseassaide, sin iežaset dárbbuid ja sávaldagaid vuođul. Sámediggi deattuha buot joavkkuid resursadárbbuid mat čatnasit soabadanproseassaide, ja ávžžuha Stuorradikki sihkkarastit resurssaid dasa. Go kvenat/norggasuopmelaččat ja vuovdesuopmelaččat leat čađahan iežaset proseassaid raportta sisdoalu ja evttohuvvon doaibmabijuid árvvoštallamiin, de áigu Sámediggi gulahallat singuin mot mii buoremusat sáhttit čájehit viidásit solidaritehta singuin.