– Sámediggi lea ovttas Sámi Valáštallan Lihtuin (SVL) oainnusin dahkan dárbbu nannet sámi valáštallama ja viiddidit definišuvnna mii dat lea ságastallamiin Kultur- ja dásseárvodepartemeanttain. Lassánan spealloruhta lea hui buorre ja addá ovdánanvejolašvuođaid sámi valáštallamii, dadjá sámediggeráđđi Maja Kristine Jåma (NSR).

Doarjja sirdojuvvo Sámediggái, mas lea ovddasvástádus spealloruđaid viidáset juohkimii. 

Sámi valáštallan oažžu dál ekonomalaš doarjaga Sámedikkis goavdeorganisašuvnna Sámi Valáštallan Lihtu (SVL) bokte. SVL:s leat golbma vuollásaš sierralihtu:

• Čuoigan, viehkan ja njoarostan Lihttu
• Sámi Heargevuodjin Lihttu
• FA Sápmi

– SVL ja Sámedikki gaskasaš valáštallanšiehtadus, mii sisttisdoallá strategiijaid nannet sámi valáštallama, vuolláičállojuvvui easka ovdalaš juovllaid, ja lean ilus go ovttasbarggus juo leat bohtosat, dadjá Jåma.

Sámediggi ja SVL leat 2023 spealloruđa ohcamušas ákkastallan ahte doarjaga ulbmil galggašii viiddiduvvot ja rievdaduvvot. Dán dihte lea doarjaga ulbmil dán rievdaduvvon nu ahte dál galgá «doalahit ja viidásetovdánahttit sámi valáštallama oassin sámi kultuvrras, gielas ja identitehtas». Doarjja Kultur- ja dásseárvodepartemeanttas sáhttá dan dihte addot eanet valáštallamiidda mat sáhttet leat mielde doalahit sámi kultuvrra, giela ja identitehta. 

Dasa lassin lea okta mihttu ahte ruđat galget váikkuhit dasa ahte šaddá eanet valáštallan ja fysalaš aktivitehta álbmogis. Doarjja galgá ovddemus geavahuvvot doaimmaide mánáide (6-12 jahkásaččaide) ja nuoraide (13-19 jahkásaččaide).

– Sámi valáštallan lea dehálaš máŋgga ládje. Erenoamážit mánáide ja nuoraide, go dat lea mielde hukseme searvevuođa ja gullevašvuođa, ja dat lea dehálaš giella- ja identitehtaperspektiivvas, dadjá Jåma.