– Lean hui ilus go mii leat váikkuhan dasa ahte Stáhta Mánáidviessu ásahuvvo Kárášjohkii dán konsultašuvdnabohtosa bokte. Seammás háliidan giitit Finnmárkku politiijaguovllu ovttasbarggu ovddas, mii lea vuosttaš geardde konsulteren Sámedikkiin, dadjá sámediggeráđđi Runar Myrnes Balto (NSR), geas lea politihkalaš ovddasvástádus konsultašuvnnain Sámedikkis.

Sámediggeráđđi Berit Marie Eira (JSL) lea váldán badjelasas ovddasvástádusa bargui veahkaválddálašvuođa ja illasteami vuostá sámi servodagas. Son lea maid ilus go Mánáidviessu ásahuvvo Kárášjohkii.

– Dáinna lágiin leat mii mielde sihkkarastime buori fálaldaga sámi mánáide geat gillájit veahkaválddálašvuođa ja illasteami. Sidjiide lea hui mávssolaš oažžut fálaldaga mii lea heivehuvvon sin gillii ja kultuvrii, dadjá Eira.

Stáhta Mánáidviessu lea fálaldat mánáide ja nuoraide geat sáhttet leat gillán, dahje geat leat leamaš vihtanin, veahkaválddálašvuođa dahje seksuálalaš illasteami, mii lea váidojuvvon. Fálaldat addo maid psyhkalaččat doaimmashehttejuvvon rávisolbmuide. Stáhta Mánáidviessu maiddái rávve ja bagada priváhta olbmuid ja almmolaš ásahusaid anonyma áššiin mat eai leat čielggaduvvon. Mánát geat fitnet Mánáidviesus galget oažžut oktiiheivehuvvon ja buori čuovvoleami fágaolbmuin geat leat čohkkejuvvon ovtta sadjái. Mánáidviessu galgá láhčit dili gažademiide ja medisiinnalaš iskamiidda ja áimmahuššat fágaidrasttideaddji ja etáhtarasttideaddji ovttasdoaibmama koordinerema.

Dál leat Norggas 11 Mánáidviesu. Romssa Mánáidviesus lea leamaš ovddasvástádus sámi mánáide