Sámediggi ii oaččo Stáhtabušeahtas eará lasáhusa go haddegoargŋuma ja ruhtavárremiid Beaivváš Sámi Našunálateáhterii ja stuoradiggedieđáhusa Meld. St.13 (2022–2023) Sámi giella, kultuvra ja servodateallin — Gelbbolašvuohta ja rekrutteren mánáidgárddis, vuođđooahpahusas ja alit oahpus čuovvoleapmái.
- Dađi bahábut lei nu maid mii balaimet. 37 miljovnna sturrosaš "Sámi páhkka" lea buot maid oaččuimet. Das leat 20 miljovnna eará almmolaš instánssaide ja loahppa leat várrejuvvon ruđat. Dađibahábut fertet mii konstateret ahte Ráđđehus ii dán ge vuoru doala lohpádusa dan nu gohčoduvvon kulturloktema ektui, dadjá Balto.
- Šaddá áibbas boastut Ráđđehusas rehkenastit haddegoargŋuma dan dábálaš bušeahtain jahkái 2023, go mii oaččuimet 12 miljovnna ruvnno gokčat lassibálká- ja haddegoargŋuma reviderejuvvon bušeahtas jahkái 2023, nu mo buot earátge stáhtabušeahtas. Haddelassáneapmi Sámediggái lea 4,3 proseantta, ii ge 6,3 proseantta nu go sáhttá ipmirduvvot go lohká stáhtabušeahta, dadjá sámediggeráđđi Runar Myrnes Balto.
Sámediggi lea bušeahttabarggustis geigen sámi bušeahttadárbbuid eiseválddiide, ja lea dievasčoahkkináššis 14/23 "Sámedikki cealkámuš ráđđehussii - Stáhtabušeahtta 2024" cealkán ahte ollislaš juolludusdárbu lea 270 miljon ruvnno. Dát sisttisdoallá dan sakka bazahallama maid Sámedikki bušeahta reálanjiedjan lea dagahan máŋggaid jagiid badjel.
- Mis leat leamaš stuora vuordámušat 2024 stáhtabušehttii, ja dárbbašit 270 miljovnna ruvdnosaš lasáhusa. Ráđđehus lea Hurdalplattforpmas lohpidan nana giella- ja kulturloktema. Lea áibbas mearrideaddji ahte Sámediggi oažžu eanet ruđaid jus dát lohpádus galgá dollojuvvot. Sámi kulturásahusat ja kulturbargit mat eai namuhuvvo njuolga stáhtabušeahtas - ja dat guoská eatnašiidda – bázáhallet ollásii ja bissot das gos leat odne, ja dat lea hui šállošahtti, dadjá beahtahallan Myrnes Balto.
SAMINOR 3 - historjjálaččat stuorra álbmotdearvvašvuođaguorahallan maid Sámi dearvvašvuođadutkama guovddáš lea álggahan - dárbbašii 30 miljovnna jus galggai leat doarvái válbmet guorahallama 2024:s. Lea juolluduvvon 13 miljovnna dán ulbmilii 2024:s.
- SAMINOR 3 sáhttá addit máhtolašvuođa sámi, kvena ja dáža álbmoga dearvvašvuođas ja eallineavttuin dihto guovlluin Davvi- ja Gaska-Norggas, ja lea čielgasit dehálaš Duohtavuođa- ja seanadankommišuvnna raportta ektui. Munnje lea áddemeahttun ahte ráđđehus ii áŋgiruša dáinna doaibmabijuin, loahpaha Runar Myrnes Balto.