Steinar Pedersen lea okta golmma olbmos geaid álgoálbmotdelegašuvdna Indigenous Peoples' Representatives and Institutions (IPRI) lea nammadan NASCO iešguđet bargojoavkkuide, ja nammadeamit leat deaŧalaš lávkin álgoálbmogiidda máhttoguoddin ja aktevran riikkaidgaskasaš luossahálddašanbarggus. Lassin dasa ahte Pedersen lea nammaduvvon ruoššaluosa bargojovkui, de lea Dr. Shelley Denny (Mi'kmaq, Kanada) nammaduvvon suodjalangeatnegasvuođaid bargojovkui ja Charlie Marshall (Mi'kmaq, Kanada) habitáhttanjuolggadusaid bargojovkui.

Silje Karine Muotka Ørjan Markatt Bertelsen

– Dát lea stuorra lávki rivttes guvlui sihkkarastin dihtii ahte álgoálbmotmáhttu maid váldojuvvo mielde NASCO mearridanvuđđui. Mun lean hui ilus go Bivdu evttohii Steinara, ja go son lea miehtan dasa ahte searvat iežas viiddis máhtolašvuođain dán deaŧalaš bargui. Sámediggái lea dát deaŧalaš ja prinsihpalaš boađus, dadjá sámediggepresideanta Silje Karine Muotka (NSR).

Steinar Pedersen lea čeahpes sámi historihkkár geas lea earenoamáš gelbbolašvuohta sámi luossabivddus, ja son lea maid dáid árbedieđuid guoddi.

– Su searvan bargojovkui lea erenoamážit mielde nanneme álgoálbmotmáhtu geavaheami NASCO barggus. Dát lea erenoamáš deaŧalaš dan ektui ahte sihkkarastit ollislaš lahkoneami daid hástalusaid meannudeapmái mat čatnasit ruoššaluosa leavvamii ja dan váikkuhussii báikkálaš ekovuogádagaide ja sámi luossabivdokultuvrii, dadjá sámediggepresideanta.

Steinar Pedersen lea juo searvan bargojoavkku vuosttaš čoahkkimii. Son atná árvvus IPRI-sáttagotti ja Sámedikki luohttámuša.

Steinar Pedersen Vegar Jakobsen Bæhr, Sametinget

– Bargojoavkku vuosttaš čoahkkin lei konstruktiiva, ja mu mielas lea rabasvuohta álgoálbmotperspektiivvaid ektui. Lea dehálaš ahte min máhttu beassá leat mielde hábmemin hálddašeami maiddái dán suorggis, lohká Pedersen.

NASCO ásahii bargojoavkku mii galggai čuovvut ruoššaluossanáli ovdáneami Davvi-Atlanteris, ja árvvoštallat mo dát šládja váikkuha atlántalaš luosa báikkálaš máddodagaide. Ulbmil lea nannet máhttovuođu ja evttohit hálddašandoaibmabijuid maiguin sáhttá váldit vára ekovuogádagain ja lunddolaš luossanális.

Bargojoavkkus lea muđui mielde Jarle Steinkjer (Norga), Jaakko Erkinaro, Mick Millane ja Tom Staveley (EU), Sergey Prusov (Ruošša), Colin Bean (Stuorrabritánnia) ja Øyvind Fjeldseth (NGO).

Pedersen deattuha maiddái man deaŧalaš lea geahčadit mo vejolaš ávkkástallan ruoššaluosas sáhttá leat ávkin sámi báikegottiide.

– Mu mielas lea áibbas dárbbašlaš ahte mii digaštallat mo dát resursa sáhttá nannet garrasit áitojuvvon sámi luossabivdokultuvrra ávnnaslaš vuođu, lohká son.

Sámediggepresideanta doarju su perspektiiva.

– Mun lean ovttaoaivilis Steinariin, ja mii áigut ain bargat dan ala ahte ruoššaluossahálddašeapmi maiddái sáhttá váikkuhit positiivvalaččat min báikegottiide. Mun jáhkán dasa lea viiddis politihkalaš doarjja, sihke Sámedikkis ja Stuoradikkis.

Steinar Pedersen vuosttaš eamiálbmot luossadeaivvadeamis (Indigenous Salmon Peoples Gathering) Kanadas 2022:s. Vegar Jakobsen Bæhr, Sametinget