– Leat leamaš ollu dovddut dán beaivvi. Lea garra vásáhus go Stuoradiggi átnu ándagassii ja dovddasta ovddasvástádusas dáruiduhttinpolitihkkii. Odne mun jurddašan sin birra geat leat gillán, massán gielaset ja kultuvrraset, ja geain leat čiekŋalis hávit. Odne lea doaivva soabadit, dadjá sámediggepresideanta Silje Karine Muotka (NSR).

Meannudeami oktavuođas oaidná Sámediggi ahte olbmot leat hui ovttaoaivilis das guđiiguin surggiiguin mii fertet bargat vai soabadivččiimet boahtteáiggis. Erenoamáš positiiva lea Stuoradikki mearrádus, mii guoská máhttui ja gaskkusteapmái min oktasaš historjjá birra dáruiduhttimiin ja vearrivuođaiguin, ja giela ja kultuvrra nannemii ja oainnusmahttimii.

- Ovddasguvlui vuordit mii aktiiva soabadanpolitihka. Otná mearrádus sihkkarastá guhkesáigásaš čuovvuleami ja dat mielddisbuktá sihke ekonomalaš ja lágalaš lassiváikkuhusaid. Muhto dađi bahábut ii dahkkojuvvo mihkke dálá eahperivttiiguin ja riidduiguin mat gusket eatnamiidda ja čáziide, dadjá Muotka. 

Sámediggi vuordá ahte viidáseappot proseassas soabadeami guvlui lea bistevaš rievdadus ja ahte nanne luohttámuša sámi servodaga ja Norgga eiseválddiid gaskkas. Mii leat gergosat aktiivvalaččat veahkehit barggus ja illudat hukset soabadanproseassa ovttas ollu servodataktevrraiguin. 

– Mun jurddašan maiddái kvenaid/norggasuopmelaččaid ja vuovdesuopmelaččaid birra, geat leat vásihan stuorra eahperievtti. Sis lea čielgasit bivdojuvvon ándagassii odne, nugo galgá ge. Mun sávan ahte sii vásihit ahte vearrivuođat njulgejuvvojit ovddasguvlui, dadjá sámediggepresideanta.