Sámediggi boahtá dán olis bidjat earenoamáš deattu valáštallamii ovtta beaivve dievasčoahkkin vahkus, gos sihke vuolláičállá valáštallan šiehtadusa, lágida seminára valáštallan fáttáin ja vel seammás gieđahallá ášši Sámedikki dievasčoahkkimis.
– Lean duhtavaš go leat soahpan valáštallansoahpamušas ja ahte mii ovttasráđiid Sámi Valáštallan Lihtus (SVL) bargat nannet sámi valáštallama, lohká sámediggeráđđi Maja Kristine Jåma (NSR).
Valáštallan šiehtadus ea.ea. lokte guovddáš fáttáid mat leat dehálaččat Sámi valáštallamii, numo čađaheapmi valáštallandoaluin, rekrutterenbargu, ealáskahttin dološ valáštallansurggiin, lassi ruhtadeapmi, oinnolašvuohta ja oččodeapmi eanet valáštalliid julev- ja lullisámi guovlluin. Sámi valáštallamis leat ollu bealit maid loktet, ja dáinna ođđa valáštallan šiehtadusain lea Sámediggi gearggus searvat bargui loktet sámi valáštallama politihkalaš dásis.
Prográmma “Valáštallama beaivi” Sámedikkis, Kárášjogas Duorastaga, Juovlamánu 8. b.:
13:00 Sámi Valáštallan Lihttu ja Sámediggi vuolláičálliba Valáštallan šiehtadusa
14:00 – 16:00 Seminára “Sámi vašši spábbačiekčanšiljus”
16:00 Dievasčoahkkin meannuda ášši 53/22 Valáštallanšiehtadus gaskkal Sámi Valáštallan Lihtu ja Sámedikki
Mielddusin Sámediggeráđi evttohus Valáštallan šiehtadussii ja prográmma sámi vaši seminárii.